El coste de la lletricidá pasará los 200€/MWh incluso a les hores más económiques el mesmu díe que dellos coleutivos convoquen un manifestamientu escontra la descomanada xubida de la lluz de los caberos meses. La cita ye güei a les siete la tardi na Plaza l’Humedal, en Xixón

El pasáu 1 de xunu entró a valir la nueva tarifa llétrica fomentada pol Gobiernu. Con esta nueva tarificación, pa los consumidores qu’opten pol Preciu Voluntariu pal Piqueñu Consumidor (PVPC), afitábense trés tramos horarios, con estremaos precios y costu del consumu en ca tramu, dividiéndo el preciu n’hores valle, hores llanes y hores punta.

De magar, la xubida superó tolos récors anteriores, encadenando picos que se superen progresivamente unos a otros, encareciéndose la enerxía eléctrica esponencialmente en pocu más de 4 meses. El titular “El preciu de la lluz va marcar un nuevu récor” repitióse tan d’avezu que paez un mantra. En concretu, pa güei espérase que’l preciu de la lluz dispare fasta una media de 288,53 euros per megavatiu hora (MWh), degolando nel tramu más caru de la xornada, ente les ocho y les nueve de la nueche,  los 319 euros, acordies los datos espublizaos esti miércoles pol Operador del Mercáu Ibéricu d’Enerxía (OMIE), pulverizando d’esta mena cualesquier recor previu; güei la lletricidá va superar los 200 euros en tolos tramos horarios, invalidando la teoría del gobiernu de que se busca mover el consumu a franxes horaries más económiques. Nin siquier nel riscar, con malpenes consumu, baxó d’esa cota, calteniéndose ente les cinco y la seis de la madrugada un preciu de 249 euros.

Pa faese una idega, na mesma fecha del 2019 el MWh superaba malpenes los 50€

El problema ye grave y fasta agora la movilización social foi mínima, en parte por mor de la dificultá qu’implica asumir qu’el que se definía como “el gobiernu más progresista de la hestoria” aceutara estes xubíes nun país nel que la probitú enerxética yá causare problemes serios los caberis iviernos, cuando la lluz costaba seyes vegaes menos. Poro, los convocantes piden a los ciudadanos que tomen conciencia del problema y alleguen a la manifestación convocada pa esta tarde en Xixón, na Plaza l’Humedal.

Llucía F. Marqués

This work is licensed under a Creative Commons Attribution 4.0 International License.