Mai Tomás y Carmela Mendez, ñeta y bizñeta de Belarmino Tomás, participaron nel actu qu’entamó Andecha Astur n’homenaxe al caberu Presidente d’una Asturies llibre y socialista, revindicando tamién la figura de Severina Vega y declarándose emocionaes por qu’Andecha caltenga la memoria de Belarmino y la so llucha “tan tapada, tan enmudecía tan silenciada… una persona que representó, xunto a los sos compañeros, una llucha y un creyer n’un mundu meyor y un creyer que se podía conseguir una vida meyor pa tolos asturianos y asturianes, que fue un exemplu pal mundu… nun ye xustu’l silenciu, pero tais equí vosotros y vosotres comu muestra de que pensáis que ye posible un  meyor futuru y de que tais dimpuestos a lluchar por ello”

¿Qué significa pa vosotres que se siga recordando la figura de Belarmino Tomás?

Yo siendo piqueña y sintiendo les hestories del mio güelu pensaba que ficiere algo importante, que yera daquién importante. Cuando llegué a España y vi qu’eso taba d’esta manera silenciao, nun entendía. Ye más, tuve muncho tiempu deslligada de toa cuestión política porque me paecía que too polo que llucharon, l’esiliu, tolo que pasaron, nun había dengún reflexu de que sirviere pa nada. Yo yera mui rebelde y poco a poco entendí que nun yera cuestión mía, que realmente nun se falaba de Belarmino porque había intereses n’ocultar lo qu’elli representaba, como decís vosotros, también la xunidá de la izquierda, cómo él y los que taben alredor d’él consiguieron que se punxeren d’alcuerdu, eso paez que nun ye posible, ye como un mitu. Entós son dellos mitos, los que representa Belarmino, que nun convién recordar.
Lo qu’el representaba, lo qu’él creyía, dayos miéu. Que la clas trabayadora tenía que ser quien fuere dueña del so futuru, decidir, tener servicios públicos, poner el dinero a favor de les persones… too eso evidentemente ye una menacia pal sistema nel que vivimos.

Destacabes tamién el papel de la to güela, Severina Vega ¿Cómu foi la llucha pa ella?

Si, quiero revindicar la figura de Severina, a la que conocí de neña en México y que tuvo siempres al par d’esti home. Cuando escucho la hestoria de Belarmino siempres pienso ¿y la güela?. Fue una vida mui intensa dende que yera chavalín y taba na mina y  peleaba col patrón, tuvo qu’esiliase varies veces y la mio güela entantu pariendo fios y al pie del cañón, cumpliendo el rol de la muyer qu’apoya al so home, teniendo enriba les sos espaldes muncho más, siempre siguiendo a Belarmino nunes condiciones penoses. Mio pa en México intentó siempres que lo que foi la revolución del 34 calara y s’escuchare y muncho altavoz nun tuvo, pero años dempués tais vosotros equí y eso agradezse de corazón.

¿Crees qu’aquello polo que Belarmino lluchó sigue vivo?

Evidentemente, por eso tamos equí, por eso tais equí, faciendo lo que faceis, porque hai algo ehí y hai persones que creen que tien que seguir vivo, que nun puede morrer esto y hai que revindicar a Belarmino Tomás como una de les principales figures de la hestoria d’Asturies. Confío en que se vos xunan más persones a lluchar polo qu’elli representa en defensa de l’asturianía y de la clas trabayadora asturiana.

Llucía F. Marqués

This work is licensed under a Creative Commons Attribution 4.0 International License.