Llucía F. Marqués

Depués d’esbardiar tres años de llexisllatura Adrián Barbón tien un plazu percurtiu pa cumplir la so promesa y oficializar l’asturianu colos mesmos drechos que’l restu de llingües del Estáu

Na mañana del sábadu 16 d’ochobre los asturianos respaldaron masivamente la oficialidá de la so llingua. ¿Cómu podría ser d’otra miente? tratábase de desixir pa si mesmos y d’una bones un drechu básicu, namás ñegáu a lo llargo la hestoria pol invasor nos países invadios comu señal másima de domeñación, el drechu al propiu idioma.

Cuasi cincuenta años separen esti manifestamientu de les primeres revindicaciones populares nes que Conceyu Bable reclamaba los drechos llingüísticos. De magar entós nun hebio añu que nun hubiere, sinón ún, dos o tres actos multitudinarios y delles campañes -polo xeneral protagonizaes por grupos nacionaliegos- en favor de la oficialidá del asturianu.

Sicasí, naide pon en tela xuiciu’l fechu de qu’esta, la d’ayeri, foi una ocasión hestórica. ¿Por qué?

En primer llugar, ta nidio, hai una cuestión de númberu: fálase de más de 30.000 persones, namás una vegada se raspiaron eses cifres y foi nel sieglu pasáu, colo qu’entós se cifró en cerca de 25.000 asturianos nes cais. Una hora dende la salida de la cabecera fasta que’l caberu manifestante salió de la estación, la cai Uría atarraquitá de xente, centenes de músicos, toles xeneraciones a una… reconozámoslo, respigante quédase curtio.

En segundu y quiciás más importante llugar, hai una cuestión d’ánimu. Por primer vegá en muncho tiempu los asturianos salieron a la cai victoriosos, sorrientes, convencios. Non gafos, defendiendo lo de so sabedores del mundiu en contra, nin gachos, resignaos a una procesión valera y repitía. Diría que la sorrisa, más qu’el númberu, ye lo que fizo d’esta una mani estremada.

Los más de 30.000 asturianos qu’ayeri salieron a la cai taben convencios del so trunfu, convencios de la Oficialidá darréu, seguros de que l’añu que vien diben poder falar la so llingua en tolos ámbetos, estudiar n’asturianu, vivir n’asturianu. Taben ciertos de que -parafraseando a Barbón- diben falar la llingua de los sos güelos, pero tamién de que -superando’l mensaxe del presidente’n munches milles- taben falando la llingua de los sos bizñetos.

Asina que nun queda otra. Al PSOE toca-y arreblagar con remangu perriba de 40 años de lliderar la represión llingüística y, obedeciendo al pueblu asturianu, ensin más demora, esculpies nin promeses valeres, aprebar la Oficialidá.

Queda un caberu pilancu, un últimu resquemor ¿Nun tará Barbón apurando endemasiao los plazos? ¿Nun lu informaría naide de qu’un añu ye escasu marxe pa una reforma del calibre que plantega? Nun quiero ser mal pensá y deducir que ta forfugando al másimu los plazos de la so llexislatura, cola ilusión, quiciabes, de dexar nuevamente la tema nel aire y volver utilizalo nes próximes elleiciones.

This work is licensed under a Creative Commons Attribution 4.0 International License.