Delles organizaciones convoquen pa mañana una concentración a les 19:30 la tardi al pie la estación de Xixón, allugá na cai Sanz Crespo, baxo’l llema “Asturies merez un tren en condiciones” y “Por un tren que vertebre’l territoriu ya enfríe’l planeta”
Tres la lliquidación por sorpresa de FEVE el 1 de xineru de 2013, la so integración en Renfe y Adif ya’l repartu de les sos aprosimao mil trabayadores ente dambes empreses públiques poníase fin a una compañía con mediu sieglu de vida. De magar, aceleróse la carrera que lleva a los trenes asturianos a una vía muerta por falta d’inversión.La despoblación rural y la falta de servicios vuelve ser el perru que se muerde’l rau: a menor población correspuende un descensu de pasaxeros -en siquier 50 estaciones asturianes xuben menos de diez pasaxeros diarios-. La priorización del interés económicu sobro’l social lleva a la supresión/retayu de servicios neses paraes, lo qu’aislla entá más a estes poblaciones, fomentando la so despoblación.
Nos caberos años retayáronse servicios indiscriminadamente, baxóse peligrosamente’l personal ferroviariu, amenorgáronse los trenes y disparáronse les llimitaciones de velocidá pol mal estáu d’abondos tramos -en dellos puntos los ferrocarriles circulen a 20 o 30 kilómetru per hora pol desfarrapamientu de terremplénes y deterioru de la plataforma-. La vieyera de los vagones entama a esmolecer seriamente, n’Asturies llegó a tar el 40% del material rodante nel taller ensin poder ser reparáu por falta de maquinaria y de personal. En dellos tramos llega a suspendese sobro la marcha la metá de los viaxes y nun ye d’estrañar que la duración de los mesmos se vea duplicada por averies nel trayeutu.
Amás de la contratación de personal y la puesta a puntu de la infracadarma y material rodante, l’etenru plan de víes de Xixón, neto que les obres de soterramientu na Felguera, son dos de les cuestiones pa les que la CNT reclama una intervención direuta que finalice d’una bones los dos proyeutos. Alerten tamién del pelligru de privatización del tresporte de mercancies ya aporfien na necesidá de facilitar la comunicación d’Asturies con Europa, al traviés de la conversión paulatina de tol ferrocarril Asturianu al anchu internacional. Pel so llau, Asturies pol clima destaca la emportancia d’un bon serviciu públicu de trenes pa amenorgar drasticamente la contaminación ambiental producía pol tráficu.
Un pasu que consideren imprescindible pa solucionar estos problemes ye l’asunción de les competencies ferroviaries pol Gobiernu d’Asturies.
Llucía F. Marqués
This work is licensed under a Creative Commons Attribution 4.0 International License.
