El Salón de Receiciones del Conceyu Xixón acoyó ayeri la presentación de la 43º Edición de la Selmana Internacional de la Montaña de Xixón – Memorial Julio Bousoño, un de los eventos más relevantes d’Europa na so categoría

El prósimu  llunes 1 de Payares  va entamar la tradicional Selmana Internacional del Monte de Xixón, entamada pola AMA Torrecerredo, dientro’l programa cultural del Conceyu de Xixón, tres el vacíu del añu 2020 por cuenta de la crisis sanitaria y les restriciones COVID-19 que torgaron la so realización. La presentación, al cargu del so organizador Marino Muñiz Muñiz, cuntó cola presencia del conceyal d’esporte Ramón Tuero, asina comu con representantes de la Federación de Montaña Asturiana y de los grupos de monte Trasgu Andayon, Ensidesa, La Calzada y LaPeñuca.

Mientres tola Selmana, a les 20:00 hores, va tener llugar una proyeición comentada pol so protagonista, cuntando con delles estrelles a nivel nacional ya internacional.

Como novedá esta edición, amás de les tradicionales proyecciones, va cuntar cola presentación de dellos llibros especializaos na montaña; va ser a les 17:00 nel Salón d’actos de la Sede de l’AMA Torrecerredo.

Dientro l’escoyíu elencu que va participar nestes xornaes destaquen pola so relevancia los hermanos Pou y el rusu Denis Urubko, pero tamién va haber la posibilidá d’alcontrase con un espertu conocedor del Cordal Cantábricu, como ye Victor Sánchez, y va cuntase amás cola presencia de Edu Martín, quien foi un de los meyores escaladores esportivos y que darréu se dedicó a la esguilada estrema. La selmana va presllar cola presencia de Sebastián Álvaro, conocíu pol so programa televisivu “Al filo de lo imposible”

Iker y Eneko Pou, dos de los meyores especialistes n’esguilada del mundu, van presentar el llunes el documental “Aupa Pou: una vida encordados”, ya’l llibru del mesmu títulu nel que se repasa la so intensa trayeutoria nesti deporte, dende la esguilada estrema en grandes parés, a les víes mas difíciles del mundu n’esguilada deportiva, cientrándose especialmente nos últimos años coles espediciones nel Himalaya, Los Andes, la Patagonia o l’Amazonia,

El martes tendráse la oportunidá de conocer a Denis Urubko, un de los montañeros qu’esguilaron les 14 cumes de más de 8.000 metros esistentes, con 23 ascensiones en total y en solo 9 años. Va presentar el documental The HoneyM8000n, nel que rellata una ascensión al Gasherbrum II na que tuvo que tomar la difícil decisión de realizar la mayor parte del percorríu en solitariu, abriendo la nueva llínea al Gasherbrum II “The HONEYM8000N” que-y valió la candidatura al piolé d’Oru 2020. Esa mesma tarde Pedro Villalba va presentar el so llibru “La virtú nos montes”

L’asturianu Victor Sánchez, natural de Benia d’Onís y equipador de numberoses zones y vies d’esguilada en Asturies, va presentar el miércoles el documental Resilencia, el preciu de la llibertá, nel que rellata la so hestoria de superación personal tres un grave accidente de monte qu’a puntu tuvo de costa-y l’amputación d’una pierna. La so pertenencia a una familia de pastores de los Picos d’Europa, de Bulnes y Caín, foi de gran ayuda a la de conocer a xeitu la zona y escribir el llibru que va presentar, “Cabrales. Guía d’Esguilada d’aventura. Escobios del Cares y Duje”.
El xueves Edu Martín va ufiertar el documental tituláu “VAL.H.AL.L.A”, que recueye un itinerariu de 380 metros a 200 del suelu y con una dificultá máxima de 9a. D’Edu destaca la so precocidá, entamando la so carrera con tan solo trelce añu.  Collechó grandes ésitos en competición indoor dende’l 99 hasta’l 2006, abandonando dempués la competición y l’esguilada indoor pa empezar a afayar nueves parés y realizando dalgunes de la rutes más difíciles del mundu, ente elles el Orbayu (8c, 500 m) nel Picu Urriellu.

La sesión del xueves va completar cola presentación del llibru “Picos de Europa, los primeros montañeros y viajeros, sus primeras escaladas“, d’Alberto Boza.

Va Cerrar la selmana Sebastián Álvaro, quien va presentar el documental  Una vida al filo sobro la so llabor como responsable del programa de Televisión Española “Al filu de lo imposible” mientres 26 años, participando a lo llargo de la so trayectoria en 200 espediciones, 60 d’elles a montes de más de 8.000m d’altor, realizando 350 documentales, nos trés polos de la tierra; Columnista del diariu As y con una sección d’aventura y esportes d’altu riesgu en “El Llargueru” de la cadena SER, dende 2016 collabora na estaya d’Aventura de los llunes nel Transistor d’Onda Cero y nel diariu esportivu Marca.

Amás va presentar el llibru “1924, Everest. L’enigma de Irvine y Mallory” nel que nos convida a sacar nueses mesmes conclusiones sobro unos fechos y unos personaxes que dalgunos consideren los primeros n’algamar la cume del Everest, muncho primero que Edmund Hillary.

Esta 43º Edición de la Selmana Internacional de la Montaña de Xixón va poder siguise nes redes sociales de l’AMA Torrecerredo o al traviés del hashtag #SIMG2021. Les entraes tarán disponibles a partir de la prósima semana nel Teatru Xovellanos o na Sede del Club Torrecerredo.

Llucía F.Marqués