Tres del ésitu de les campañes “Asturies nun tien Rei” y “República Asturiana” nel caberu añu, los asturianos tornen a salir a la cai refugando, non solo la forciada sumisión al Reinu d’España, sinón la denomación impuesta de “Principado” al nuestru país, por anacrónica y ayena a la sociedá asturiana
Añu tres añu les asturianes y asturianos concéntrense coincidiendo cola entrega de los Premios Principiegos p’amosar a los monarques españoles la so refuga. Mañana la Escandalera tornará enllenase de voces contra’l Reinu d’España na concentración convocada coincidiendo cola entrada y permanencia de los monarques y los sos convidaos al Teatru Campuamor.
“El futuru d’Asturies nun ye continuar siendo un “Principado” de naide. Asturies refuga esa condición, que sólo tien una desplicación hestórica: poner al frente d’Asturies un príncipe español foi la ferramienta de control políticu con que la corona española quinxo asegurar el sometimientu d’Asturies a los sos intereses” declaren dende Andecha Astur, una de les organizaciones qu’afala a participar nesta concentración.
Pela so parte, na so recoyida de robles contra la figura del Principado, FAMYR, que tamién convoca pa mañana, destaca “Si Asturies quier tener personalidá y aspira a ser dueña de la so hestoria, a través d’una democracia plena y avanzada nun puede en forma dala caltener dengún venceyu, seique seya meramente simbólicu, con una istitución non democrática, como ye la Monarquía, y menos aun na so denomación oficial”.
La figura de la República ye la escoyía hestóricamente pol movimientu obreru asturianu nos momentos en que garró nes sos manes la guía’l so futuru, declarándose’n 1934 la República Obrera y Campesina d’Asturies y en 1937 el Conseyu Soberanu d’Asturies y Lleón. Poro, esa ye la figura que dende la izquierda asturiana se intenta recuperar pal gobiernu’l país.
La cita ye mañana, de magar les 17:30 la tardi na Escandalera, escontra la presencia n’Asturies de los Borbones y escontra los actos monárquicos qu’entama la so Fundación Princesa.
Nuria Prendes
This work is licensed under a Creative Commons Attribution 4.0 International License.
