L’eventu foi un puntu d’alcuentru colos sos raigaños pa la descomanada cantidá d’asturianos y asturianes que se vieron forciaos a emigrar a la capital española
Esti sábadu 23 d’ochobre celebróse nel Centru Asturianu de Madrid una xornada dedicada a la lliteratura n’asturianu. El programa d’actividaes, entamáu conxuntamente por Iniciativa pol Asturianu y pol Centru Asturianu de Madrid, incluyó una presentación de la versión asturiana de La Rexenta pol so traductor, Víctor Suárez. Esta presentación valió pa valorar el trabayu de tornar al asturianu una obra d’esta envergadura.
Dempués, de la presentación tuvo llugar una mesa redonda que reflexonó sobre la oficialidá llevando’l títulu ‘El futuru del asturianu en xuegu. ¿Por qué ye necesaria la oficialidá”. Na conferencia, los ponentes Pilar Riesco ya Inaciu Galán treslladaron la importancia d’algamar la declaración de la oficialidá pal idioma. Nesi sen, Iniciativa pol Asturianu quier destacar l’entusiasmu de los y les asistentes al alderique reclamando la solución constitucional pa salvar l’idioma y llograr la igualdá de drechos n’Asturies.
Siguió l’actu cola presentación del Concursu de Relatu Curtiu en Llingua Asturiana realizáu en comuña ente Iniciativa pol Asturianu y el Centru Asturianu de Madrid cuyes bases van facese publiques dientro d’unes selmanes.
L’actu continuó con una llectura de poemes cola participación del públicu y de representantes d’Iniciativa pol Asturianu y del Centru Asturianu de Madrid.
Remató esti día de les Lletres en Madrid con una semeya de dalgunos asistentes reclamando la oficialidá del Asturianu.
Redaición InfoAsturies
This work is licensed under a Creative Commons Attribution 4.0 International License.
