Les llistes d’espera na Sanidá Pública Asturiana nun dexen de xorrecer: nel caberu añu medraron nun 19% les consultes especializaes, con fasta seis meses d’espera

A finales de setiembre del 2020, en plena pandemia y tres meses de confinamientu, 70.742 asturianos teníen cita pindia col so especialista. A finales de setiembre del 2021, en plena “recuperación de la normalidá”, son 84.183 los pacientes en llista d’espera.

Lliderando’l ranking, les consultes d’Oftalmoloxía, con casi 16.000 cites n’espera y un tiempu de demoranza de 102 díes, asina comu les terapies del dolor, con una media de 162 díes d’espera. Nesti últimu  casu’l dañu al paciente ye duple, una y bones la demanda d’estes terapies ta bien rellacionada colos retrasos de ciertes ciruxíes. Traumatoloxía atropa tamién una llarga llista, 11.780 pacientes aguardando ser atendíos.

Destaca’l casu de determinaes áries nes que l’espoxigue de consultes n’espera l’últimu añu foi descomanáu, como ye’l casu de cardioloxía, con un 85% de xorrecimientu o neuroloxía, con un 75% más.

La solución d’imponer hores estres a los facultativos, reconocen dende la Conseyería de Sanidá, nun furrula Lo que se precisa ye una fuerte inversión na Sanidá Pública que-yos permita cuntar con más medios, tantu materiales como humanos.

Llucía F. Marqués