La Economía Social ye la protagonista d’estos premios, apurríos pola Agrupación de Sociedaes Asturianes de Trabayu Asociáu y Economía Social

Esta selmana tuvo llugar la entrega delos XVII Premios ASATA, colos que la Comisión Executiva de l’Agrupación de Sociedaes Asturianes de Trabayu Asociáu y Economía Social reconoz el llabor desendolcáu por empreses, persones ya instituciones na promoción y defensa de la Economía Social. Esti añu 2021, el galardón a la meyor empresa ASATA recayó en Tasi Acesible Mieres, cooperativa creada en 2011 y que fixo de la ciudá de Mieres el conceyu con meyor ratiu de tasis afechos por habitantes.

Na estaya de meyor proyeutu empresarial d’economía social el premiu foi para dos proyectos: Astuenerxía, cooperativa llétrica asturiana ensin ánimu d’arriquecimientu, constituyida en 2018 pa un modelu enerxéticu caltenible y de calter participativu, y YeCaseru Catering, qu’ufierta una alimentación casero y variao a casa en tolos pueblos del conceyu de Salas y contorna.

Finalmente, la reconocencia a la promoción y el fomentu de la Economía Social concedióse a la Escuela d’Estudios Cooperativos, “polos sos más de 30 años de trayeutoria docente y d’investigación nel ámbitu de les organizaciones de participación y sociedaes cooperatives”.

Los Premios ASATA cunten cola collaboración de la Conseyería d’Emplegu, Industria y Promoción Económica del Principáu d’Asturies, Llaboral Kutxa, Anuariu Guía d’Asturies y Asturgar SGR.