Iker y Eneko Pou enllenaron ayeri’l Teatru Xovellanos cola proyeición de “AÚPA POU. Una vida encordados”, que tamién da entítulu al llibru sobro la so trayeutoria que presentaron na see del club de monte Torrecerredo, organizadores del eventu

Los Hermanos Pou son dos escaladores y alpinistes profesionales mundialmente conocíos qu’esguilaron munches de les montar̃es más guapes y abegoses de los 7 continentes, incluyendo complexes espediciones a los llugares más inhóspitos de la tierra, como Himalaya, el Polu Norte ya’l Polu Sur, formando parte de los equipos internacionales de les principales marques de monte y esportes estremos como: The North Face, RedBull, Petzl o la Sportiva.

Pero amás de too eso, los Pou son unos escelentes comunicadores, capaces de tresportar al espectador dica la cume d’un monte en Perú, llevalo de paséu por dalgunos de les paraxes más inesploraos del Himalaya y traelu de vuelta a “Rayu”, la cabera vía abierta polos hermanos nos Picos d’Europa, too ello ensin perder la sorrisa nin la cercanía, como si pasiase per parés que naide anantes -y pocos dempués- percorriere fora lo más cenciello del universu.

Comu “teloneros” de los Pou, dellos de los rapazos que formen parte de la Escuela d’Esguilada Torrecerredo cuntaron la so esperiencia na Travesía de Sierra Nevada el pasáu branu.

Dientro del completísimu programa de la 43 Selmana Internacional de la Montaña de Xixón, güei tóca-y la vez al polacu Denis Urubko, cola presentación de “HoneyM800n”, a les ocho de la tarde, precedía pola presentación del llibru “La virtú nel monte”, de Pablo Batalla.

Les entraes pa les proyecciónes de la selmana puen alquirise na see del Torrecerredo o nel Teatru Xovellanos, tanto presencialmente comu on line.

Llucía F. Marqués

This work is licensed under a Creative Commons Attribution 4.0 International License.