La Plataforma contra la Contaminación de Xixón acusa al gobiernu d’anteponer los porgüeyos empresariales a la salú de los ciudadanos y retoma la so actividá, convocando pa mañana miércoles 3 de payares una concentración qu’abre una temporada de protestes pa denunciar la escesiva polución carecía na ciudá

Colos peores datos de contaminación atmosférica d’España y de los peores d’Europa, Xixón nun destaca precisamente por ser el “Paraiso Natural” que vienden p’Asturies.

Hasta’l 16 d’ochobre, solo na estación mididora del Lloredal recoyíense 89 díes nos que se superaron los niveles de PM10 aptos para la vida humana. Sicasí, esa cifra quédase coxa, yá que como acusen dende la Coordinadora Ecoloxista d’Asturies, la xestión municipal, ta «omitiendo los datos de polución alegando problemes técnicos», daqué qu’interpreten como un cabileñu intentu d’esconder los malos datos d’esta zona.

La reticencia a poner en marcha’l protocolu recoyíu nos planes de calidá del aire ye otra de les cuestiones que llevaron a la Plataforma contra la Contaminación a acusar a l’alministración xixonesa de dexación de funciones y van llevar el casu «énte la Fiscalía y énte el Defensor del Pueblu».

Y ye que na zona Oeste de Xixón la contaminación ye daqué apalpable. Lliteralmente, apalpable: la ropa tendío na cai apaez puerco, el fedor ye incaltenible, los coches risquen cubiertos d’una capa anegratao y les plantes amorien nes ventanes con una tiez indefinible de suciedá nes sos fueyes. Inevitable pensar nel dañu qu’esto fai nos pulmones de los qu’ellí viven.

Los peores valores en PM10, afeutando especialmente, pero non solo, al Oeste de Xixón, tienen un orixe claramente industrial, apuntando direutamente a Arcelor y sobremanera al Sinter. Ye por ello que la Plataforma contra la Contaminación acusa al gobiernu d’anteponer los intereses empresariales a la salú de los ciudadanos y poro faen un llamamientu «al restu de persones que viven na zona oeste y a toos los xixoneses que, quiera que non, puedan sentise afeutaos, pa que piensen na salú de los sos fíos, de los vieyos y enfermos, y nel apioramientu de la calidá de vida que supon nun poder faer esporte na cai, ver los nuesos vehículos escomíos y reparar cómo la suciedá invade tou na nuesa redolada» y acudan mañana a la concentración que va tener llugar na Plaza Mayor a les 16:30.

El próximu martes 9 de payares a les 19 hores nel Atenéu de la Calzada aconceyarán otra vuelta pa valorar prósimes acciones.

This work is licensed under a Creative Commons Attribution 4.0 International License.