Ente los díes 3 y 6 de payares, nel Palaciu de Congresos del Calatrava n’Uviéu va tener llugar la trixésimo tercer edición de los World Cheese Awards, l’eventu queseru más internacional nel que la representación asturiana siempres foi relevante

Ser la mayor mancha quesera d’Europa, con más de cuarenta variedaes estremaes de quesu nuna superficie de 10.604 Km cuadraos, yá ye motivu abondu pa qu’Asturies rellume nel mapa queseru del mundu; entá asina, estos díes hai un focu mayor qu’apunta al país: la cellebración del eventu llacteoqueseru más importante del mundu na nuesa capital.

Miles d’amantes de los quesos averense nestos díes dende tol mundu a conocer los más de 4.000 quesos de los 5 continentes qu’aportaron a Uviéu pa ser valoraos polos 230 xueces internacionales qu’aconceya’l World Cheese Awards.

El Asturies Paraísu Natural International Cheese Festival -que tuvo d’aplazase en 2020 pola pandemia- entama mañana con fuercia y a lo llargo d’esta selmana va haber ponencies científiques y gastronómiques, un foru d’innovación llactoquesera, un Gastro Cheese Comedy -cola cocina en direutu de chefs tan reconocíos como José Andrés-, y un mercáu nel que van participar 65 espositores internacionales.

La hostelería carbayona nun ye ayena a la oportunidá y estos díes puede esfrutase d’una ruta del quesu pelos llocales de la ciudá, o votar nel concursu de pinchos queseros promovíu dende’l Conceyu.

Xicu Llamazares

This work is licensed under a Creative Commons Attribution 4.0 International License.