Asociaciones pesqueres de Galicia, Cantabria, País Vascu y Asturies sollertaron, n’una carta unviada al Ministeriu de Facienda, de les dificultaes de los armadores qu’afaenen nes agües del nordés del Atlánticu porque los sos marineros titulaos prefieren trabayar a bordu de navíos d’otros países comuñales con meyores condiciones, especialmente de Francia, el Reinu Uníu o Irlanda

El Secretariu Xeneral de la patronal d’armadores Cepesca, Javier Garat, desplica que l’abandonu de los pescadores escontra otros países detéctase dende va años n’estayes de flota como l’atuneru o’l pallangreru y xustifica esta fuga alegando ventaxes fiscales y la falta d’una reforma na Formación Profesional.

Pa la patronal, la inestabilidá qu’implica’l cobru “por partes” -esto ye, por porcentaxe sobro la pesca-, la precariedá del so conveniu coleutivu y les meyores condiciones llaborales n’otros países nun son el problema y la solución nun pasa por ufiertar trabayos meyor remuneraos y menos duros, sinón por camudar la llexislación sobro reconocencia de títulos, de manera que puedan contratar pescadores d’otros países -Indonesia ye’l so principal oxetivu- a los que poder esplotar llibremente.

Otru cambéu n’estudiu consiste en dotar a los patrones de mayores competencies (ampliar el so saléu más llueñe).

El pesqueru ya’l pescaderu súmense asina al ca vuelta más llargu llistáu de seutores que se llamenten de nun atopar personal dimpuesto a trabayar nellos, pero que nun analicen los motivos dende’l puntu de vista de la persona emplegable pa refugar les sos ufiertes, atopando la solución na contratación d’inmigrantes dispuestos a aceutar cualisquier condición llaboral, por precaria que seya.