Llucía F. Marqués
La falsa polémica xenerada alrodiu de la organización d’una serie de cuentacuentos pa la reciella nel Xardín Botánicu de Xixón, na qu’un d’ellos, “La Bruxa del Botánicu”, yera n’asturianu, val pa señalar l’incumplimientu de los Planes de Normalización Llingüística por parte’l Botánicu
Agradezo al partíu español que punxera’l focu d’atención na llingua de cellebración de les actividades del Xardín Botánicu de Xixón. Gracies a ellos y les sos zunes asturfóbiques agora mesmo tola sociedá asturiana ye cosciente de la discriminación llingüística qu’implica la programación d’esti espaciu. Non solo la programación, que ya de por si incumple dende va más de cincu años los Planes de Normalización Llingüística, sinón la cartelería, rotulación ya indicaciones, llegalmente obligaes a tar n’asturianu y español -comu mínimu- pero que tan esclusivamente n’inglés y español.
Nesta ponte una d’ente 4 actividaes empobinaes a la reciella féxose n’asturianu, y si m’entruguen diré que Ciudadanos tien razón nes sos afirmaciones. Quiero dicir, que ye inasumible, vergoñoso, impresentable, esta imposición llingüística; ye un auténticu despropósitu torgar a la reciella l’esfrutar d’actividaes na so propia llingua. Les prósimes 34 actividaes del Botánicu tan programaes n’español dafechu “impidiendo a les families que son asturfalantes disfrutar d’esti recursu”.
Sicasí, quiero espurrir el mio analís d’esti casu un pocu más allá. Igual ye necesario aparar a camentar nello ¿Porqué los españoles reacionen con tanta celeridá p’atacar en cuantes s’utiliza l’asturianu? quiero dicir ¿Porqué nun hai la mesma capacidá de rempuesta inmediata ante les discriminaciones diaries que carecemos los asturfalantes? ¿Naturalizamos fasta tal puntu la represión que’l fechu de qu’un 25% de les actividaes pa la reciella nuna ponte festiva nos paez un ésitu? ¿Porqué a naide se mos ocurrió nestos cincu años reclamar al Botánicu que cumpliere les normatives del conceyu en materia llingüística? Hai que tar mui sollertes, nun seya que’l vezu de contentanos con migayes nos lleve a considerar victories cuestiones que nun pasen de ser llimosnes. Hai qu’asumir que lo que se desixen son drechos, plenos, y que nun hai que pidir esculpies por ello.
This work is licensed under a Creative Commons Attribution 4.0 International License.
