En plena campaña trunfalista pola baxada estatal de les cifres de desemplegu n’ochobre, los sindicatos recuerden qu’Asturies suma 1.548 persones más al paru nesti mes, con más del 50% de los paraos ensin cobrar prestaciones y otru 25% sobreviviendo con menos de 452€ mensuales
Asturies tien esti mes 65.756 persones rexistraes nel paru, 1.548 más que nel mes de setiembre, pesia les abondes contrataciones nel ámbitu educativu. El paru torna xorrecer con más puxu ente les muyeres y la mocedá.
D’ente les persones que s’atopen desemplegaes, tan solo 32.119 (menos de la metá) recibe dalgún tipu de prestación y ente quienes la reciben alrodiu de 18.000 sobrevive con ingresos menores a los 452 € al mes.
La contratación sigue destacando por una apolmonante precariedá, siendo asina que el 90’04% de les contrataciones son temporales, con espoxigue de los trabayos a tiempu parcial, que lleguen a costituyir un un 45% de les mesmes.
Esta nueva medría del númberu de persones nel desemplegu coincide con un momentu de xubida xeneralizada y xabaz de los precios, colo que’l poder alquisitivu de los asturianos -tamién de los que tienen trabayu- sigue amenorgando.
Nuria Prendes
This work is licensed under a Creative Commons Attribution 4.0 International License.
