Asturies tuvo representada na Xunta Xeneral d’ELEN por dellos miembros d’Iniciativa pol asturianu
La Xunta Xeneral de la Rede Europea d’IgualdáLlingüística (ELEN, poles sos siegles n’inglés) vien d’escoyer nueva direutiva, cola presidencia d’Elin Haf Gruffyd-Jones, profesora galesa perconocida nel ámbetu los audiovisuales pa les llingües minorizaes y miembru del comité científicu del Protocolu de Garantía de los Drechos Llingüísticos.
Formen parte de la nueva direición d’ELEN FerranSuay (ACPV), Paul Bilbao (Kontseilua), Marcos Maceira (A Mesa), MirjamVellinga (Afûk), Domhnall Mac Nèill (CnaG), Conchúr Ó Giollagáin (Soillse), Ciarán Mac GiollaBhéin (Comhairle), Padraig ÓTiarnaigh (CnaG), Claudia (CNR), Anneli Sarhimaa (Univ. Mainz), Krisztina Sandor (EMNT), Rosa de les Neus Marco/Marga Payola (Plataforma).
A la Xunta Xeneral, que se cellebró en Santiago de Compostela, acudió una delegación asturiana d’Iniciativa pol Asturianu, encabezá por Iván Llera ya Inaciu Galán, presidente y vocal de Rellaciones Institucionales ya Internacionales respeutivamente.
Les diferentes entidaes asistentes amosaron el so interés pola situación de la llingua asturiana ya’l procesu de reforma del estatutu d’autonomía pa reconocer la oficialidá del idioma, consiguiendo d’esta manera l’estatus llegal que merez.
La Xunta Xeneral dio la bienllegada al prósimu Decenio Internacional de les Llingües Indíxenes 2022 – 2032, que foi proclamada por la Xunta Xeneral de la ONU. La Llei Xeneral del Audiovisual foi otru puntu importante que se trató nel alcuentru pol so impactu nes llingües minorizaes, aprobándose una resolución d’A Mesa demandando que s’asegurase la igualdá de toles llingües oficiales na futura Llei Audiovisual na que s’alcuentra trabayando’l Gobiernu d’España. Nel alcuentru, tamién se faló de la Llei Molac francesa, propuesta llexislativa entamada pol diputáu bretón Paul Molac, que ye una llei pa la protección y la promoción de les llingües rexonales.
Iniciativa pol Asturianu forma parte d’ELEN dende la so fundación nel añu 2011. Esta organización internacional ensin ánimu d’arriquecimientu trabaya pola promoción y protección de les llingües territoriales europees. Representa a una totalidá de 47 idiomes, con 168 organizaciones miembros de 24 estaos europeos. La Xunta Xeneral d’ELEN, qu’esti añu se cellebró en Santiago de Compostela, foi posible col sofitu y la collaboraciónd’A Mesa pola Normalización Lingüística, la Universidade de Santiago de Compostela y el Museo do Pobo Galego.
Redaición InfoAsturies
This work is licensed under a Creative Commons Attribution 4.0 International License.
