Nel añu 2011, cuando les primeres voces entamaron a alzase falando de “xenocidiu anunciáu”, Asturies cuntaba con 1.081.487 moraores; agora son 1.011.560 . La prensa menospreció y ridiculizó entós de lo qu’agora ye un fechu asumíu: el Pueblu Asturianu ta en víes de desaniciu, comu’l pitu montés o l’algaire

Asturies perdió 70.000 moraores en namás diez años por causes vexetatives y cuéntase que nos prósimos diez pierda comu mínimu otros tantos, sigún datos de la Sociedad Asturiana d’Estudios Económicos ya Industriales (Sadei) Con tres muertes por nacimientu -9.918 frente a 3.588- una población progresivamente avieyada y unes condiciones de precariedá vital que torguen a la mocedá cualisquier idega de procreación, la cosa pinta mal. En tola serie hestórica, desde que se recueyen n’Asturies datos demográficos, enxamás nun pintó tan mal.

Les proyeiciones más optimistes apunten a que pa dientro diez años quedaremos unos 941.364 asturianos.

Si l’añu pasáu achacábemos a les defunciones Covid les cifres 1 a 3, nesti queda nidio que’l problema, más que l’alta mortandá esperable nuna población tan avieyada, ye la escasa natalidá. Ñacieron esti añu mil rapacinos menos que nel mesmu periodu del 2020. Precisamente l’añu pasáu foi destacable por baxar de los 5.000 nacimientos por primer vegada dende que se recueyen datos, con 4.919; esti añu nun paez que vaigan algamase los 4.000 siquiera.

Les razones pa esta xabaz cayía abulten evidentes pa Andecha Astur, qu’abordaba la cuestión na so Xornada contra la precariedá “Dami Tira”, la selmana pasada “cuando nun hai vivienda, nin estabilidá llaboral, nin perspeutives de futuru, cuando tener onde vivir implica un coste de la metá d’un sueldu o del 99% d’un salariu social, cuando la temporalidá y la precariedá son lo xeneral en los contratos, naide puede reprochar a les asturianes que decidan nun tener fios; más allá d’una decisión personal, hai una imposibilidá material de formar una familia”.

A les cifres de decrecimientu vexetativu hai que sumar les derivaes del saldu migratoriu, tamién fuertemente negativu.