Sieglu y mediu de bona música, dinamizadora de la cultura y promotora de diversos proyeutos educativos y artísticos de gran interés pal futuru de la ciudá, ensin escaecer el so llabor social, la Banda de Música de Xixón atópase agora énte un importante puntu d’inflexón que pon en peligru la so continuidá

La Banda Música de Xixón entamó esta selmana una rueda de contautos cola Federación d’Asociaciones de Vecinos de Xixón y tolos grupos políticos del conceyu pa poner sobro la mesa la complexa situación que traviesa. Más de 150 años d’hestoria y un futuru prometedor como referente y focu de cultura y educación na ciudá atópense agora escolingaes d’un filu.

Abanderada de la cultura na ciudá, esta entidá non solo brinda diversos conciertos d’un altu nivel artísticu mientres tol añu, sinón que tamién ufierta una variada ufierta educativa al traviés de la Escuela de Educandos y l’Escuela Permanente de Dirección, única n’Asturies y de les poques esistentes nel Estáu Español, lo mesmo que d’inminentes proyeutos como la nueva Nueva Banda Sinfónica de Xixón o’l prósimu Festival Academia de Música de Branu, convirtiendo a l’asociación n’un de los focos culturales más importantes de la ciudá.

L’agrupación caltuvo la so actividá estos caberos años ameyorando de cutio la so calidá gracies sobremanera al enfotu y trabayu de los sos componentes; inclusive cuando’l COVID preslló les puertes de la cultura na ciudá, la Banda de Música de Xixón foi de les poques entidaes culturales que caltuvo la so actividá y compromisu colos xixoneses al traviés de la so escuela y de decenes de conciertos polos barrios de la ciudá. Sicasí, na actualidá, aspeutos como les condiciones del conveniu de collaboración col Conceyu o los retrasos y dificultaes nos pagos llevaron a l’agrupación a una situación incaltenible, viéndose obligada a solicitar un creitu bancariu, a cesar parte de la so actividá o inclusive al estremu de facer frente a delles factures al traviés del bolsu de los mesmos músicos.

Redaición InfoAsturies

This work is licensed under a Creative Commons Attribution 4.0 International License.