Cuatro alderiques abiertos al públicu centraron la xornada del sábadu, dando una revisión xeneral al presente y pasáu del sindicatu como una manera d’enfocar el so futuru
Un impresionante mural preside’l recién anováu salón d’actos na Casa Sindical pal ochavu Congresu de la CSI, que coincide colos sos cuarenta años d’andadura. Dende aquelles primeres barricaes qu’amburaron el Xixón de los ochenta a les actuales movilizaciones, nun sindicatu que toma cada vez más sectores y que llucha en frentes bien diversos, hubo una evolución grande, si non en fondu -que sigue fiel a los sos principios de defensa de la clas obrera- sí na forma, más amplia y diversa, con importante presencia nos xulgaos y meses de negociación, pero ensin escaecer la relevancia de la llucha na cai.
Ye un bon momentu para estrayer conclusiones de les esperiencies, escuchando tantu a el fundadores de la CSI como a les persones que se fueron incorporando a lo llargo de los años y a les nueves xeneraciones que van ser el futuru del sindicatu. N’esi sen agora mesmu tan somorguiaos nun procesu congresual qu’entamó esti sábadu con una xornada pública “La Radiografía d’Asturies” y va siguir con otres dos, de calter más internu, nes que van decidir el sindicatu que quieren para los próximos años.
Na xornada del sábadu tuvieron llugar na see de la CSI, na cai Sanz Crespo de Xixón, una riestra d’alderiques públicos col envís, como’l so nome indicaba, de realizar una radiografía de Asturies y les sos revindicaciones.
La primer conferencia del día fixo un repasu a los “40 años de la CSI ya’l sindicalismu nel sieglu XXI” y nella intervinieron el profesor d’hestoria Rubén Vega, l’afiliada a CSI de la enseñanza Herminia Gonzàlez y Sergio Muñiz, un de los integrantes más nuevos del sindicatu. Tres la visión histórica del primeru, que punxo en situación tola xornada al traviés d’un completu repasu a la evolución del sindicatu, los otros dos espunxeron la forma na que llegaron a formar parte de la CSI y cómo afayaron qu’esti ye’l sindicatu que daba rempuesta a les sos necesidaes y esmoliciones.
La siguiente, “Muyeres en Llucha” tuvo como protagonistes a cinco muyeres – Marta Rodil, Sara Retuerto, Ana Laviada, Alejandra Tejón y Imelda Astriz – qu’analizaron en fondura les relaciones esistentes ente les lluches feministes y de clas.
La primer intervención de la tardi, que cuntó cola presencia de periodistes de Nortes y la TPA, cientróse na importancia de los medios de comunicación y na insistente invisibilización de la llucha per parte de bona parte de la prensa asturiana. “Lo que nun se ve nun esiste” cuntó cola participación de Laila Bermúdez, Diego Díaz, Rubén Díaz y Pedro Menéndez.
Na postrera de les charres “En busca de lo común” Elena García, Darío de Les Heras, Carmen Álvarez, José Luis Vázquez y Héctor González plantegaron la necesidá de xunise na llucha, buscar puntos de mancomún y xunir los enfotos de les estremaes estayes profesionales.
Llucía F. Marqués
This work is licensed under a Creative Commons Attribution 4.0 International License.
