Manifestamientu contra la contaminación el día 6 en Xixón, onde los datos de les estaciones midiores de la contaminación apurren davezu datos bien perriba de la media permtía pola Organización Mundial de la Salú

Los valores llende diarios de partícules suspendíes nel aire fueron superaos de cutio, les midíes de bencenu (sostancia conocida pol so potencial efeutu canceríxenu) fixeron saltar les alarmes n’abondes ocasiones y les nubes de fumu procedente de les chimenees entamen a paecer yá parte del paisaxe xixonés.

Pal so control, el Protocolu d’actuación n’episodios de contaminación del aire na zona Oeste de Xixón, ye pa los vecinos un “engañabobos” del Conceyu Xixón col que traten d’aparentar un enfotu que nun tienen por igual el problema. P’activalu namás se tienen en cuenta 4 estaciones de control de la contaminación, de les menos representatives, por tar escondíes pa llibrales de la mayor contaminación (como ye’l casu de La Calzada o la de Xove), por nun ser los sos datos públicos (son d’EDP o d’Arcelor y nun tan disponibles de continuo) o direutamente, nun esistir siquiera, comu la del Lloredal qu’entá nun ta puesta. Tampocu importa muncho, porque la web del Conceyu que s’encarga, por llei, de dar estos datos, lleva meses averiada. 

En cualisquier casu, en casu de ser activáu, los vecinos apunten a la inutilidá d’un protocolu que, lloñe de protexer a la población y ayudar a reducir el problema de contaminación que carecen va décades los vecinos, castígalos con restriciones a la movilidá que valen pocu más que p’aparentar que se fae daqué, cargando sobre los ciudadanos la responsabilidá d’una contaminación que de fechu ye principalmente industrial. El protocolu “ye más coladeru que’l protocolu del Principado”  denuncien dende la Coordinadora Ecoloxista, cuyes allegaciones presentaes al protocolu nun foron atendíes.

Por tou ello y pa desixir la toma de midies reales y efeutives contra la contaminación, en tolos ámbitos, ya en toa Asturies, la Plataforma contra la Contaminación de Xixón tan preparando un manifestamientu pal 6 d’Avientu a les 12:00, que saldrá del Parque Begoña y al que llamen a participar a tolos ciudadanos, por una industria llimpia ya una transición ecolóxica y social que respete a la salú de los ciudadanos. 

Llucía F. Marqués

This work is licensed under a Creative Commons Attribution 4.0 International License.