Dientro de 4 años, ya ensin devolver lo que cobró fraudulentamente, UGT podrá volver a solicitar sovenciones públiques

La xusticia vien de condergar al sindicatu UGT y a varios de los sos ex responsables n’Asturies por un «sistemáticu desvíu de fondos públicos» venceyáu al fraude coles sovenciones públiques pa los cursos de formación de 2011 y 2012. La sentencia conderga a la delegación asturiana de la UGT a pagar 122.000 euros. La UCO de la Guardia Civil estimó en más de 1’35 millones d’euros el fraude cometíu pente los años 2010 y 2014, seique sigún la Intervención Xeneral de l’Alministración del Estáu la cifra final pue ser muncho mayor.

Aparte de lo robáo pente’l 2011 y 2012, reconozse un fraude mayor nos años anteriores, que nun compulsa por tar prescritu’l delitu cuando por fin se llevó a xuiciu, seique los fechos yeren conocios de magar el 2015, cuando se detuvo al Secretariu Xeneral del sindicatu, Justo Rodríguez Braga, xunto a otros 5 representantes del mesmu, ordenándose’l rexistru del llar sindical.

Demientres estos años, el sindicatu socontrataba pa dar los cursos a otres empreses, delles venceyaes al propio sindicatu, incluyendo nes factures sobrecostes por conceutos inesistentes que revertíen a la UGT Asturies. Puesto que parte d’estos fondos proveníen d’ayudes europees pa la formación pal emplegu, de les que s’apropiaron illegalmente, Andecha Astur llevó nel 2019 la denuncia d’estos fechos ante l’Organismu contra’l Fraude de la Xunión Europea, la OLAF, siendo almitía la mesma en xineru del 2021.

Arriendes de la ridícula multa al sindicatu, el xulgau conderga al exsecretariu xeneral de la UGT asturiana hasta 2016, Justo Rodríguez Braga, a dos años y diez meses de cárcel y una multa de 586.000 euros y al resto de acusados, Mónica Menéndez Vázquez, exsecretaria d’Alministración de UGT Asturies y alministradora d’Infastur, María Jesús Ocaña, alministradora única de Localmur y Formación 2020, Manuel Díaz Cancio, exsecretariu de Formación d’UGT , Alberto González Castaño, téunicu responsable de la xustificación de les sovenciones n’UGT  y Silvia Sariego Ferrero, encargada de lo mesmo n’IFES, con penes que van de los 18 meses a los 3 años y 8 meses.

Podría decise que a la UGT salió-y bien la xugada, el saldu xeneral son más de 1.227.072 € de beneficios pal sindicatu y 641.972 € de perda pa tolos asturianos. Amás, en solo 4 años pueden entamar a ganar perres coles sovenciones otra vuelta.

Nuria Prendes

This work is licensed under a Creative Commons Attribution 4.0 International License.