Anxel Pardo tien 21 años, vive y quisiere seguir viviendo n’Oures, un pueblu del conceyu Valdés, pero la precariedá y temporalidá de los trabayos disponibles, xunto coles males comunicaciones pónen-ylo perdificil, un casu más pente les decenes de miles que finen por debuxar una Asturies rural que se desanicia

¿Con qué dificultaes vos alcontrais la mocedá a la de vivir nun pueblu?

Na zona rural tenemos varios problemes que nos dificulta’l poder quedanos nel pueblu una vez vamos teniendo edá d’incorporanos al mundu llaboral, una d’estes barreres ye la mala comunicación col tresporte públicu, nel mio casu, solo tenemos un autocar al día col que la movilidá ye bien limitá, otru problema ye que al nun poder cuntar con una bona conexón de tresportes tenemos que faer usu del nuesu coche para movenos a trabayar, cosa que ye complicada d’adquirir, yá que para nós un coche nun ye un caprichu, si non que ye necesariu para poder gananos la vida, otra barrera qu’atopamos la xente xoven son los empleos precarios y de curtia duración, como pueden ser les recoyíes de les fabes.

¿Qué consecuencies tien eso nos pueblos?

Cada vez somos menos los mozos y mozas que vivimos na zona rural, la gran mayoría tien qu’abandonar el so pueblu ensin querelo por temes ligaos al empléu y estudios, faen la so nueva vida na ciudá y los pueblos van quedando vacíos pol abandonu escontra les nueses zones.

¿Ye un procesu sele o diríes que s’aceleró nos caberos años?
El despoblamientu, so la mio esperiencia, yá que vivu nel campu, va a un ritmu muncho más esmolecedor de lo qu’unu se puede imaxinar y esta sangría demográfica nun tien previsión de parase viendo que cada vez más xente tien más claru que tarde o tempranu va tener que buscase un futuru llexos del so pueblu y non por una decisión voluntaria, si non una decisión obligada, ya que la moceda ta condenada a escoyer ente buscase’l so futuru na ciudá o quedase desamparaos na precariedá, l’abandonu y con la vista puesta nun futuru inciertu.

This work is licensed under a Creative Commons Attribution 4.0 International License.