La perda capacidá alquisitiva súmase al mayor vezu de mercar por interné ya en grandes cientros comerciales, perxudicando seriamente’l comerciu de prosimidá, qu’a la fin ye’l que puxa pola economía del país
Dientro’l Estáu español, Asturies ye’l segundu territoriu en que más empeoró la cuestión, depués de Melilla. La media estatal foi d’una cayía del 2’5%, habiendo dellos territorios nos que medró la venta en comercios minoristes.
Les ventes d’artículos personales (ropa, complementos…) foron les más perxudicaes, con un descensu del 17’7% interanual, siguíes de les d’equipu del llar, que cayeron un 7%. Nel seutor d’alimentación ye nel que menos se notó l’amenorgamientu, pero tamién perdió venta, un 1,3%. Les grandes cadenes, tipu franquicia, tamién perdieron volume de negociu, fasta un -6,3%, siendo les grandes superficies les úniques que meyoraron nel so porcentaxe de venta, un 0’7%.
Hai que decatase de que se tan faciendo comparaciones col añu anterior, ello ye, en plenu andanciu, cuando taría más xustificao la compra a distancia. Sicasí, la tendencia a la compra a domiciliu lloñe de tornar a la normalidá, sigue espoxigando, col consiguiente dañu pal piqueñu comerciu.
La compra a domiciliu nun ye l’únicu factor a considerar nesti baxón de les ventes al comerciu de prosimidá; nun podemos despreciar el pesu nes ventes de la perda de capacidá alquisitiva de los pensionistes y los trabayaores de la mayoría de los seutores, por nun mencionar la cuasi nula capacidá de compra del xorreciente númberu d’asturianos en situación de probitú.
Llucía F. Marqués
This work is licensed under a Creative Commons Attribution 4.0 International License.
