Nun foi’l maltratu animal nin la imposición cultural, sinón el fechu de poner un nome desaveniente a los toros torturaos lo que llevó al Conceyu xixonés a esaniciar del so calendariu los espectáculos taurinos, y tampoco ye la so crueldá l’argumentu para negar el contratu a la empresa Circuitos Taurinos, sinón a cencielles, que nun hai obligación d’anovalu

El Conceyu de Xixón deniega, como anunciara, la prórroga del contratu d’esplotación y organización d’espectáculos taurinos la empresa Circuitos Taurinos na plaza municipal de toros d’El Bibio que-y dexaba faer usu del cosu xixonés n’agostu.

Reconocen que la llexislación española torga prohibir les corríes de toros, por ser considerao nel artículu 46 de la Constitución que la tauromaquia ye “padremoñu cultural d’España dignu d’especial protección”, pero alvierten que tampoco obliga a disponer d’un espaciu pa la so celebración y poro, permitirá acutar l’usu de la plaza pa otres actividaes, refugando’l so usu a la empresa taurina.  La empresa d’arruelu Divertia manifestó que “precisa d’esi espaciu para la so programación de branu”.

Esta salida, sicasí, nun dexa de ser un remiendu temporal y que dexa u furacu abiertu a la cellebración d’eventos taurinos, una y bones nada torga a la empresa taurina solicitar el so usu en cualesquier otra dómina del añu, allegando entós n’igualdá de condiciones con cualquier actu cultural, ensin que pueda tenese en cuenta’l sesgu sádicu y españolista d’esta actividá ya ensin que pueda aplicase la llei que prohibe’l maltratu animal y l’usu d’animales n’espectáculos d’arruelu.

Llucía F. Marqués

This work is licensed under a Creative Commons Attribution 4.0 International License.