La so cimera revindicación, pero non la única, ye garantizar un preciu pa la llechi que permita continuar cola so produción

Tres de l’aconceyamientu de ganaeros, nel que s’evaluó l’ésitu del manifestamientu del pasáu xueves 2 d’avientu y la reación del gobiernu d’Asturies ante’l mesmu, los presentes alcordaron salir en manifestación darréu  fasta la Delegación de Gobiernu, onde ficieron tol ruíu posible coles llueques del so ganao. “Vamos siguir asina fasta que Barbón mos reciba” avisaron.

Otra parada nel so camín foi delantre les puertes del Mercadona, onde denunciaron el míseru pagu que se yos da a los productores n’orixe por unos bienes que, pa cuando aporten al consumidor depués de pasar por tola cadena, cuesten decenes de vegaes más de lo que se yos paga. Denuncien que’n munchos casos cobren perbaxo del coste mesmu de produción.

Un de los asistentes vertió simbólicamente un llitru llechi “pa lo que mos paguen por ello, val más tiralo“, aporfien, y alvierten de que los manifestamientos y midíes de presión van continuar mentantu nun se-yos ufra una solución que-yos permita caltener la so manera de vida. Por agora, tan convocaos toles selmanes delantre Delegación del Gobiernu.

Llucía F.Marqués

This work is licensed under a Creative Commons Attribution 4.0 International License.