Nun escritu remitíu a la Xunta Pola Defensa la Llingua, convocantes d’esti premiu añal en defensa de los drechos llingüísticos y que fae por caltener viva la memoria del poeta dixebriegu Andrés Solar, que da nome a los premios, Andecha Astur fizo aportar la so candidatura al Pegollu na XXXVII convocatoria de los Premios proponiendo a don Xosé Lluis García Arias.

Comu argumentación pa la concesión d’esti premiu faen un rápidu repasu a la indispensable llabor de García Arias, cuyu camín ta fuertemente venceyáu a los anicios de la llucha pola oficialidá y a la dignificación de la llingua asturiana al traviés de l’ALLA “Ente xente asturiano nun fai falta señalar los méritos indiscutibles que convierten a García Arias nesa presona a la qu’Asturies tanto-y debe; abasta señalar la so condición de reconocíu filólogu y profesor, autor d’obres fondamentales na normalización de la nuesa llingua, fundaor y primer presidente de Conceyu Bable y presidente de l’Academia de la Llingua Asturiana dende’l so entamu en 1981 fasta 2001”.

Per otru llau, señalen sentir señaldá del otru premiu qu’avezaba conceder la Xunta, el de la Madreña de purpurina, desaniciáu l’añu pasáu y destináu a denunciar a quienes ponen pilancos a la reconocencia de los drechos llingüísticos de los asturianos, proponiendo pa esi galardón a don Adrián Barbón Rodríguez, secretariu xeneral de la FSA-PSOE y presidente del Gobiernu d’Asturies, “qu’un añu más enrieda cola oficialidá ensin concedela y ta dimpuestu a hipotecar los nuesos drechos llingüísticos a mayoríes falsamente democrátiques de tres quintos de la Xunta Xeneral, a ñegamos que seya llingua vehicular nel enseñu y a ñegamos que seya de necesaria conocencia na fonción pública, dando continuidá asina a los más de 40 años de represión llingüística protagonizá por gobiernos del PSOE n’Asturies”.

El plazu pa la presentación de candidatures al Premiu Andrés Solar fina’l 31 d’avientu y elles tienen d’unviase a info@exunta.org.