SUATEA vuelve denunciar el fraude de llei na contratación de personal interín de la Conseyería d’Educación
El pasáu vienres, 17 d’avientu, el Ministeriu d’Educación presentó un borrador de Real Decretu para modificar el RD 276/2007 que regula’l reglamentu d’ingresu, accesu y alquisición de nueves
especialidaes nos cuerpos docentes, borraor que se lleva a Mesa Sectorial de negociación güei martes, 21 d’avientu, con una urxencia inusitada qu’enzanca la participación de los implicaos na negociación.
Los sindicatos d’enseñanza amuesen en total desalcuerdu col testu, que según espliquen dende SUATEA nun respuende n’absolutu al principal oxetivu: asegurar la estabilización del personal docente interín en situación d’abusu que más esperiencia atropa y que, poro, soportó mientres más años la contratación temporal.
Siquier la propuesta reconoz, anque transitoriamente la llegalidá d’un accesu estremáu – concursu-oposición y concursu de méritos- que ye lo que siempres defendieron dende los STEs, anque estos nun la quieren como midida esceicional, sinón como sistema que garantice la oportunidá de estabilización al colectivu interín.
D’esta miente, quien nun superen los procesos selectivos nos trés primeros años de la so vida llaboral pol sistema de concursu-oposición y formen parte de les llistes d’aspirantes a interinidá, desempeñando puestos docentes de forma temporal, podríen optar al concursu de méritos cuando atroparen más de 3 años d’antigüedá.
Denuncien amás la opacidá de l’Alministración Educativa asturiana no que cinca al cómputu de places interines, nel que SUATEA percibi posible fraude de llei. En base al analís del Proyectu de Llei de presupuestos Xenerales delPrincipado de Asturies para 2022, deduzse qu’hai 1475 places presupuestaes pa personal docente interín, cifra duplicada poles contrataciones interines realizaes ente les dos primeres convocatories del actual cursu escolar 2020/21, d’onde se deduz que les aprosimao 1500 persones interines, aparentemente non presupuestaes, tan dientro de la plantiya orgánica/estructural. O lo que ye lo mesmo: ta contratándose añu tres d’añu a personal interino pa ocupar puestos de plantiya orgánica, xenerando un flagrante abusu na contratación de personal temporal.
Redaición InfoAsturies
This work is licensed under a Creative Commons Attribution 4.0 International License.
