Vivir con 30 euros al mes: el gobiernu d’España fexo el díe de Nadal un peculiar regalu envelenáu a los perceutores del Ingresu Mínimu Vital, al suspender o minimizar ensin previu avisu los cobros de miles de families el mesmu 24 d’avientu

El pasáu 24 d’avientu les redes sociales entamaron a ferver con notificaciones de congoxa de persones a les que se-yos taba ingresando’l Ingresu Mínimu Vital del mes, pero amenorgáu en cuasi la so totalidá, siendo ello que la mayoría declaraben cobrar pente 20 y 40 euros, en llugar de los 400, 600 u 800 colos que subsistíen les sos families nos meses anteriores. Nun entamu pensóse que yeren casos aisllaos, posibles errores d’alministracion, per otru lláu frecuentes. Sicasí, col pasu’l díe foi viéndose que yeren cientos, miles, los afeutaos por esti drásticu retayu a los sos ingresos.

Les consecuencies van más pallá d’un mal mes, ya que la imposibilidá de pagar factures, alquileres ya hipotéques derivará en recargos, cortes de suministros ya incluso desfiucies. Les primeres rempuestes oficiales al problema apunten a qu’esi sedrá’l salariu que percibirán los afeutaos demientres el prosimu añu, al actualizase los importes del IMV acordies la declaración de la renta del 2020, ello ye, les persones que cobraron daqué va dos años nun tienen drechu a ayudes esti.

El fechu de que nun hubiere comunicación previa alvirtiendo de la perda d’esi drechu y el que se ficiere ante un díe festivu y fin de selmana, ensin posibilidá de buscar información sobre lo que pasaba, dexó a los perceutores del IMV -que ya nun cuntaben, por definición, con más recursos que pa subsistir- nuna situación de desamparu completu. El detalle de facelo el mesmu díe de Nuechibona añade un estra d’innecesaria mala fe a la situación, especialmente considerando que la mayoría de los perceutores d’esti sofitu son families con menores a cargu.

Nun pue valorase entá el númberu d’afeutaos porque son munches les persones qu’entá nun cobraron -dellos bancos retienen les pagues durante díes tolos meses, retrasando’l pagu fasta fin de mes- polo que  tan na incertidume de lo que van cobrar esti mes.

Los perceutores del IMV reacionaron con velocidá, convocándose darréu protestes y movilizaciones per toa Asturies, pesi a nun esistir dala plataforma vertebraora del movimientu. En total son 15 les convocatories pal prósimu 31 d’avientu:

• Avilés, cai Eloi Fdez Caravera.
• Xixón, Plaza’l Carmen
• Uviéu, cai Santa Teresa de Jesús
• Cangues n’Av. Cuadonga
• Cangas, Cuesta la Vega
• Gozón, cai Ramón Pérez d’Ayala
• Llangréu, Plaza Soto Torres
• Gráu, cai Eulogio Díaz Miranda
• Cuideru, cai Dr. Fleming
• L.lena frente al Hotel d’Asociaciones
• Ribeseya, Campu las Rollas
• Tapia, Plaza Veya Nicolás López Cancio
• Mieres, Ramón Pérez d’Ayala
• Valdés, cai Gil Parrondo Rico
• Llanes, Av. El Muelle

Toes estes direiciones correspuenden a oficines de la Seguridá Social de los respeutivos conceyos.

This work is licensed under a Creative Commons Attribution 4.0 International License.