“El compromisu d’Andresín pa col país ye innegable. Naide puede poner en dubia lo que pa elli representaba la nuesa cultura, la llibertá, Asturies” declaró Llucía Fernández, vocera d’Andecha Astur, na so intervención
La lluvia apurrió si cabe más fuercia al actu qu’Andecha Astur cellebra ca añu n’homenaxe d’Andrés Solar Santurio, escritor, políticu, activista y firme defensor de la cultura y la llingua asturiana, que dexó tráxicamente’l mundiu a la pronta edá de 29 años.
La gaita precedió a les pallabres de Llucía Fernández, quien fexo un rápidu repasu de los méritos d’Andrés na so vida pa cientrase dempués na so obra y nes implicaciones de les sos pallabres, faciendo una interpretación social de trabayos del autor comu’l cuentu de “Los pas de Xintu Xeromu” o “Yerase una vez un dúo de tres”, pa finar remembrando el poema nel que l’autor resumió’l so naguar por una Asturies llibre, el mesmu que ta grabáu na placa que lu remembra na entrada’l cimenteriu “Prúyemos un pueblu llibre/ que nome cola so voz/ los sos collacios y el pan/ prúyemos un pueblu llibre/ y una Asturies dixebrá”
Darréu, los presentes, formando un pasiellu d’asturines, foron desfilando un a un, posando una flor enriba una asturina y faciendo un saludu a la imaxe d’Andresín recoyía na placa, nun intre d’intensa solemnidá nel que la gaita marcó’l ritmu.
Pa finar tuvo llugar una llectura de dalgunos de los sos poemes, tres de los que se dió por fináu l’actu.
Nuria Prendes
This work is licensed under a Creative Commons Attribution 4.0 International License.
