“Nun ye pola Asturies vaciada, ye pola Asturies vacilada”, yera un de los cancios que se sintieron nel multitudinariu manifestamientu convocáu por Asturies Ganadera, nel que más de 5.000 persones y 531 tractores reclamaron ayeri n’Uviéu los drechos de ganaeros y agricultores

Sicasí, lo que recibieron ayeri foi una nueva vacilada del Presidente, Adrián Barbón, que colaba pela parte d’atrás del edificiu mientres los manifestantes pedíen ser atendios na puerte principal de Presidencia del Gobiernu. Anantes de la carga policial, los miembros del gobiernu llegaron a dedicar cortes de manga a los ganaeros dende les ventanes del edificiu, caldiando un ambiente nel que ya se respiraba tensión: non en baldre tan reclamando les midíes que-yos permitan siguir viviendo de les sos tierres.

La situación ye incaltenible, denuncien, la xubía los costes de produción y l’estancamientu o mesmo cayía de los precios de venta faen tremar al seutor más antigüu de la economía asturiana, aquel del que depende direutamente la Soberanía Alimentaria del País.

Al manifestamientu nun faltó naide, rapacinos en tractores de xuguete, gaites, cabres, caballos, Reis Magos con carretilles, bidones de purín, 500 tractores…

El percorríu entamó en La Llosa, camín del edificiu de Presidencia, onde cuntaben ser recibios por dalgún miembru del Gobiernu y onde, ante la negativa de ser atendios, espusieron los craneos de les cabres muertes pol llobu.

A lo llargu’l camín los manifestantes recibieron abondes amueses de sofitu por parte de la población carbayona.

Seique entá nun hai fecha, les movilizaciones d’esta Plataforma -ayena a tolos sindicatos- continuarán, comu pocu, fasta que seyan atendios pol gobiernu.

Llucía F. Marqués

This work is licensed under a Creative Commons Attribution 4.0 International License.