Pesia les munches promeses del gobiernu español, y del “Principado” lo cierto ye que la postrer planificación de Bruseles nun recueye’l tramu d’AVE L.lena-Uviéu-Xixón y piérdese d’aída ufría pola XE

El Ministeriu de Tresportes, Movilidá y Axenda Urbana reconoció a la Xunión Europea que nun tien previstu executar les obres pa enllargar la llínia d’alta velocidá a Uviéu y a Xixón enantes de 2030 y, de resultes, va perder l’aída económica ufiertada nel so momentu per Bruxeles. Falamos d’un bon plizcu, cuidao que l’Executivu comuñal ufiertárase -fai yá diez años- a costear el 20% de la obra pa completar la llínia d’Alta Velocidá n’Asturies, pero que, debíu al importante retrasu qu’atropa esti proyectu, va esmucise. La Comisión Europea presentó’l pasáu mes d’avientu al Europarlamento una propuesta de revisión de la Rede Transeuropea de Tresporte , pal alderique previu a l’aprobación definitiva del plan, na que propón sustituyir la llínea d’Alta Velocidá La Pola L.lena-Uviéu-Xixón prevista na rede principal pela llínea convencional yá esistente y xustifica esta decisión dempués de que, según recueye’l mesmu documentu, España informara de que «anguaño nun hai nengún plan pa construyir nueves llínies d’alta velocidá nestos tramos pa 2030». D’esta forma, na nueva planificación oficial de la XE’l tramu L.lena-Uviéu-Xixón quedaría reflexáu como una llínia convencional a ameyorar en llugar de como llínia d’alta velocidá cofinanciable.

O, lo que ye lo mesmo, nesti documentu comuñal la llínea d’Alta Velocidá acabaría al altor de Campumanes.

L’AVE de Campumanes a Xixón ye una infracadarma conflictiva pol munchu dañu mediuambiental que supón, por embargu ye una de les múltiples promeses del gobiernu español y del “Principado” que llegaron a considerala prioritaria ya indispensable.

Redaición InfoAsturies

This work is licensed under a Creative Commons Attribution 4.0 International License.