Un 3% de los asturianos consultaos por un estudiu de la Universidá d’Uviéu tien plan de suicidiu. La investigación tasa en más del 65% de la población los afeutaos por traumas derivaos de la pandemia

L’aislamientu, la ruina económica, la congoxa, el miéu y la restrición de les relaciones personales llevaron qu’una cuarta parte de los asturianos albidre que “asina nun paga la pena vivir”,

En 2020, l’añu de la pandemia, les muertes por suicidiu ente menores de 50 años doblaron a les producíes pola COVID-19, según datos del INE. N’Asturies, nesta franxa d’edá, nueve persones finaron pol virus frente a 17 que se suicidaron. Sicasí, nun ye obligatoria la cita preventiva al sicólogu pa entrar n’establecimientos públicos, nun hai partíes económiques millonaries pola salú mental, nun s’imponen protocolos que llinden los factores de riesgu nin se considera unos paries irresponsables y poco menos qu’asesinos a quien nun vean la necesidá de practicar la profilasis sicolóxica.

La incidencia media del suicidiu n’Asturies ye de más de 13 casos por cada cien mil persones, anque xube a los 25 por 100.000 habitantes na franxa d’unos 100 kilómetros que xune la población de Gozón con Cangues. La tasa media d’España ye de poco más de 7 suicidios por 100.000 habitantes, según datos del INE.

L’últimu estudiu del grupu d’investigación de la área de Psiquiatría de la Universidá d’Uviéu  apunta a que al 9% de los asturianos que carecen una enfermedá mental crónica hai que sumar el 65% de la población asturiana, que carez dalgún tipu de trestornu rellacionáu cola pandemia; una cuarta parte de la población piensa que les restricciones faen que nun mereza la pena vivir nestes condiciones y un 3% tien un plan de suicidiu. Los problemes d’ansiedá y el consumu d’alcohol amuesen una alarmante medría y restalla la incidencia en menores, con un bultable espoxigue de la so presencia nes consultes sicolóxiques y siquiátriques.

Llucía F. Marqués

This work is licensed under a Creative Commons Attribution 4.0 International License.