L’apurada “descarbonización” y l’ausencia d’estratexa y plan a mediu y llargu plazu dexen a Asturies ensin medios pa defendese énte l’encarecimientu de la lluz y l’abusu de les llétriques
Les empreses de mercáu llibre ufierten precios fixos que s’actualicen en distintos plazos, en concretu, en xineru, polo que fasta agora los sos veceros nun notaren la xubía de la lluz. Les empreses comercializadores d’lletricidá tán aplicando a los sos veceros medríes nel preciu de la enerxía qu’alcen la factura en redol al 80% al respective de va un añu, inclusive dempués de l’aplicación de les midíes coles que’l gobiernu “trata de amortiguar” l’impautu de la crisis enerxética. Nel casu de Asturies esto afeuta a mediu millón de consumidores, ente empreses y llares. Ente les eléctriques que dieron el pasu de revisar dende xineru los precios de los sos contratos ta TotalEnergies, la comercializadora con más implantación n’Asturies desque en 2020 adquirió la cartera de veceros domésticos d’EDP, y Repsol, la segunda comercializadora.
Col zarru aceleráu de les centrales térmiques del país, rematáu en 2020, somos más vulnerables a les fluctuaciones, como yá anunciaren munches voces que nos años 2018 y 2019 alvertíen de los riesgos de llevar a cabu una descarbonización exprés, de les consecuencies de nun caltener -como Alemaña- una reserva enerxética y de presllar dafechu los pozos mineros y les centrales térmiques, entá ye más cuando nun taba desendolcáu un proyeutu enerxéticu nacional caltenible basáu n’anovables respetuoses col mediu ambiente asturianu. La perda de la soberanía enerxética imposibilita a Asturies buscar salíes propies al curtiu plazu pa esta crisis.
Llucía F. Marqués
This work is licensed under a Creative Commons Attribution 4.0 International License.
