L’añu pasáu recibieron sovención el 5% de los propietarios que la solicitaron, quedando ensin ella 85 edificaciones que cumplíen tolos requisitos por esgotase’l créitu dimpuestu
El pasáu diez de xineru espublizóse nel BOPA la información referente a la dotación de sovenciones pa rehabilitación, conservación y restauración d’horros, paneres y cabazos. El presupuestu total pa les mesmes ye de 300.000 euros, con un importe másimu de 7.500 euros por actuación, una cantidá que nel casu d’una panera nun algama nin el diez por cientu del coste mediu d’una igua, denuncien los propietarios.
Teniendo en cuenta que son más de 30.000 les edificaciones hestóriques d’esta triba qu’esisten n’Asturies y que tan na inmensa mayoría en llamentable estáu, 300.000 euros ye un presupuestu risible. D’estos 30.000 horros, 14.566 cunten con proteición padrimuñal, lo que nun torga’n dengún casu’l so desaniciu, comu se demostró en Vis.
Les opciones son dos, o los importes concedios son ínfimos (si namás cuntamos los más de 15.000 horros esentos de proteición toquen a 20 euros, si cuntamos toos a diez) o refúguense masívamente les solicitues. L’añu pasáu foron 43 les aides concedies, frente a otres cerca de 700 denegaes, 85 d’elles cumpliendo tolos requisitos pa recibir sovención pero que nun se yos concedió por “esgotase’l créitu disponible pa la convocatoria”. Tamién se produxeron renuncies a cobrar la sovención ante cuantíes que rondaben los 400 euros, cantidá que facía imposible a los propietarios plantegase siquiera entamar la obra; nesta situación alcontrábense 13 de les 43 sovenciones concedíes. Namás ún recibió más de 6.000 euros.
Llucía F. Marqués
This work is licensed under a Creative Commons Attribution 4.0 International License.
