Les cifres del INE tasen en 2.000 al añu’l númberu d’asturianos que se van a Madrid, a un ritmu de casi seis al día, peso la realidá ye entá peor, yá que son munchos los qu’a pesar de tener residencia en Madrid siguen empadronaos en Asturies
El furacu negru que representa la capital española absuerbe unu de cada cuatro emigrantes asturianos, principalmente nuevos con alta formación, que van siguir ellí’l restu de la so vida. Quien dexen el país tán más preparaos que los que se queden, xenerando non solo un vaciáu sinón una especie de selección na que baxa’l nivel mediu de formación de la población asturiana al mesmu ritmu que xube la media d’edá. Nesti círculu viciosu, los que se queden pueden optar casi puramente a trabayos de baxu nivel, principalmente hostelería, una y bones la industria y construcción perdieron anguaño más de 7.000 empleos, y dada la so inestabilidá económica va ser difícil que se decidan a tener fíos.
L’alta empleabilidá, xunida a meyores condiciones llaborales esplica esti fenómenu, sofitáu pol centralismu de l’alministración española, que supón qu’el 80 % de los trabayadores de los ministerios tean en Madrid, según qu’ellí s’atope la see de la metá de los mil grandes empreses del país.
Redaición InfoAsturies
This work is licensed under a Creative Commons Attribution 4.0 International License.
