Comu decía’l cantarín ya’l sieglu pasáu, entamamos tar fartos de repetinos… seique non por ello vamos parar de glayar
Si hai daqué de lo que podamos tar arguyosos los asturianos ye de nun mos rendir, polo menos na cuestión llingüística. Pasemos pela imposición xabaz del español, la represión direuta ya en munchos casos violenta de los asturfalantes, demientres la dictadura, la posterior represión, quicias non tan violenta pero igual de direuta, de los sucesivos gobiernos del PSOE n’Asturies, pa llegar ya cansaos y cola llingua fería a la represión discreta, combinada con promeses, que tan bien remanen Barbón y asociaos. A estos altores ya recibiéremos la estocada de la “galleguización” de la fala y los retayos de conteníu al conceutu llegal mesmu d’Oficialidá y vamos ya pa dos llexisllatures aguantando traiciones de quienes algamaron el puestín con promeses.
Sicasí, siguimos. Siguimos na cai, siguimos glayando, siguimos, sobre tou, falando, escribiendo, viviendo n’asturianu. Y non, nun mos dan puestinos, nin pagues, nin perres dengunes por ello. Lo que nos da ye la vida y nun vamos a renunciar a ello, a estos altores de la hestoria teníen que dir decatándose d’ello.
Poro, ayeri arrodióse delles vegaes la Xunta Xeneral, pente la impotencia, el cabréu y una bona plizca d’esperanza, y volvió a glayase, “¡l’Asturianu Llingua Oficial!”. Porque nel fondo sabemos que depende tou de la voluntá política d’unos cuantos, de los mesmos que retrasaron a costafecha la reforma fasta facer cuasi inviables los plazos y agora, dientro d’esa Xunta Xeneral, danse palmadines en costazu y xueguen al teatru de la negociación. Porque sabemos que la “voluntá sincera y decidida” de sacar alantre una reforma del Estatutu autoboicoteada nin ye sincera, nin decidida.
Namás pido a los asturianos dos coses, que sigan glayando tolo que faiga falta y que nun se dexen engañar más, nin por promeses, nin pola imposición de “amabilidaes llingüístiques” sospechoses. Nun vaiga ser que depués de tanta brenga mos vendan una Oficialidá en vacio.
Llucía F. Marqués
This work is licensed under a Creative Commons Attribution 4.0 International License.
