La redaición del nuevu currículu d’Educación Infantil ufierta una oportunidá única pa que la Conseyería d’Educación cumpla cola llegalidá y ufierte clases d’asturianu dende infantil
El Conseyu de ministros vien d’aprebar el Real Decretu d’ordenación y Enseñances mínimes de la Educación Infantil. Nél establez el calter educativu de tola etapa (0-6), la gratuidá del segundu ciclu (3-6 años) y la progresión d’esa gratuidá pal primer ciclu de (0-3 años), priorizando l’accesu d’escolinos en riesgu de probitú y esclusión social.
A partir de les enseñances mínimes establecíes, Asturies nel exerciciu de les sos competencies, va tener que componer el so currículu de la Educación Infantil asturiana y el profesoráu contextualizalu y afaelu al centru educativu y a los neños y neñes que conformen el so grupu. El currículu d’Infantil entamará a llantase nel cursu 2022-2023.
Concretar el currículu n’Asturies, recuerden dende’l sindicatu d’enseñantes asturianu SUATEA, obliga a respetar el marcu llexislativu esistente. Ello implica respetar cuestiones como la recoyida na Llei d’Usu de 1998, que nel so artículu 10.1 obliga a “Nel exerciciu de les sos competencies, el Principáu d’Asturies tien de garantizar la enseñanza del bable/ asturianu en tolos niveles y graos, respetando sicasí la voluntariedá del so aprendizaxe. Comoquier, el bable/asturianu va ser enseñáu dientro l’horariu escolar y va ser consideráu como materia integrante del currículu”.
El gobiernu actual y tolos pasaos incumplieron esa obligatoriedá, ensin que los currículos recoyeren denguna referencia a les llingües d’Asturies nin a la obligatoriedá de la ufierta de la so enseñanza nesta etapa. Consecuencia d’ello ye que nes escueles asturianes solo una parte minoritaria del alumnáu d’Infantil recibe clases d’estos conteníos. Nin siquier el pidimientu de los pas fai que la Conseyería d’Educación cumpla cola so obligación, como ye’l casu del Colexu Públicu Santiago Apóstol de Mieres onde cuasi’l 100% del alumnáu de 4 grupos d’Educación Infantil (EI) demandó recibir enseñances de Llingua Asturiana, denegándose-yos el drechu a recibiles por nun ampliar media xornada del docente contratáu.
La concreción ya implantación pal cursu 2022-2023 en Asturies del nuevu currículu de EI ye una oportunidá inmeyorable pa que la Conseyería d’Educación corrixa toes estes irregularidaes llegales.
Redaición InfoAsturies
This work is licensed under a Creative Commons Attribution 4.0 International License.
