El Miel d’Asturies vien d’algamar la protección transitoria a nivel estatal y, anque ta pendiente de completar la certificación n’Europa, yá ye posible usar la marca  IXP pa etiquetar los productos

El miel asturiano, ellaborao a nivel profesional principalmente nel Suroccidente asturianu, axunta unes característiques estremaes a otros mieles, por mor de les peculiaridaes xeográfiques, climátiques y de flora del país. Consiguir la IXP, pendiente entá de ser certificada a nivel européu, va garantizar que’l miel con esa contraetiqueta ye producío, estrayío y envasao n’Asturies, axuntando toles condiciones sanitaries y de trazabilidá desixíes pola normativa, apurriéndo-y un valor estra y asegurando la so alta calidá.

La puesta en marcha d’un Conseyu Regulador de la IXP ye’l siguiente pasu a dar y va tar llideráu pola Asociación pa la Promoción y Xestión de la Indicación Xeográfica Protexía (IXP) Miel d’Asturies. Ésti va ser l’encargáu d’ellaborar el rexistru detalláu de productores y envasadores y de crear los organismos de control que respuendan pol proyectu.

A falta d’una redación concreta de los requisitos, los productores de miel asturiano que podríen beneficiase d’esta IXP ronden los 100, con una producción averada valorao n’unes 200 tonelaes de miel, que podría medrar hasta los 400 nos próximos años. La intención ye que la collecha del 2022 llegue al mercáu certificada nel caberu trimestre del añu, pero tarrezse que los plazos llegales enzanquen el procesu.

L’apicultura ye un sector n’alza en Asturies, anque entá minoritariu, con una media d’edá pente los sos productores inferior a la mayoría de les actividaes agrícoles y ganaeres.

.

This work is licensed under a Creative Commons Attribution 4.0 International License.