Cunten que cuando’l Gallu Montés ta en celu, el so ritual d’apareamientu absorbelu de tala mena que ye fácil pillalu despreveníu, lo que facilita bultablemente la so caza. Nós nun tamos despreveníos, la señal d’alerta lleva prendía cuatro décades ensin que se punxera en marcha denguna estratexa eficiente pa frenar la so desapaición. Científicos del Grupu d’Investigación en Xestión de Recursos Cinexéticos y Fauna Montesa del Institutu d’Investigación en Recursos Cinexéticos, en collaboración con investigadores y técnicos de xestión de la fauna montesa de delles instituciones portugueses, suices y españoles, utilizaron modelos de captura-recaptura espacial y muestreu non invasivu d’ADN pa envalorar el tamañu actual de la población de Gallu Montés en tol cordal Cantábricu. Amás, pa la evaluación del so estáu poblacional, analizaron la trayectoria de la población nos postreros 42 años na aguada sur del cordal, utilizando un modelu poblacional integráu. Los datos científicos asina recoyíos confirmen la dramática situación del Gallu Montés nel cordal Cantábricu: envalórase’l tamañu de tola población en 191 individuos con 60 femes y 131 machos. La ária ocupao por ellos nel cordal Cantábricu amenorgóse un 83% dende la década de 1970.

Esta información podría sirvir p’alcontrar estratexes de xestión de la especie más eficientes, yá que a partir de los modelos resultantes ye posible entender y prever la dinámica poblacional. Los autores d’esti trabayu d’investigación suxeren trabayar p’ameyorar el reclutamientu y la supervivencia del Gallu Montés, y faer una xestión forestal que fomente’l so caltenimientu. Amás, señalen que la xestión de la especie tendría de contemplar la evaluación y considerancia de la viabilidá xenética d’esta población.

Llucía F. Marqués