Xicu Llamazares

Les pallabres de Barbón son un fiel indicador de la direición de los enfotos de los asturianos. Golífalos, escúchalos, afalágalos con falses promeses y déxalos cayer; pero en mediu siempres cae daquién que lu cree y munches semeyes pa la posteridá

El PSOE “es el partido receptor de los problemas del medio rural, el más presente en él” diz el home que salió pela puerte d’atrás -delles vegaes- cuando la xente’l campu foi a falar con elli, dexando a la policía al cargu l’asuntu.

Tamién se pon gallu al falar de “profundizar en la reivindicación del orgullo de la identidad asturiana” -dicho asina, n’español, comu tolo que diz- , pero nesti casu, pa que nun s’esmolezan los sos xefes, recuerda poner el remate “formando parte del proyecto común que es España”, ello ye, fae por subise al carru del “asturianismu políticu” pero na llinia de la “oficialidá amable” que tamos viendo aú mos lleva. Por eso, Barbón aseguró que la FSA intensificará sus mensajes en clave de “asturianismo político”.

Na mesma llinia fala agora, a llexisllatura cuasi presllada, d’afalar una llei de recuperación demográfica cola qu’aparar la sangría poblacional que’l so partíu y elli mesmu nel so mandáu impulsaron coles sos polítiques.

Dexo pal final la más rescamplante. Lo que más-y esmolez ye’l xorrecimientu desorbitáu de VOX. Dizlo’l presidente que regaló n’Asturies un grupu parllamentariu a los facistes de VOX.

Lo pior ye qu’habrá quien lu crea.

Per otru lláu, toes estes declaraciones hai que lleeles pente llinies comu perbones noticies p’Asturies, Adrián nun se sube a dengún carru mal xuncíu y si fala de defensa del mundiu rural, d’identidá asturiana, de llingua y de recuperación demográfica nun ye sinón porque ve nello posibilidaes de votos, ello ye, porque ve l’enfotu del Pueblu Asturianu de reclamar pa si respetu pola so identidá y llingua, por recuperase y por dar puxu al so campu. Eso sí ye una bona noticia: los asturianos reclamen respetu y quieren Futuru p’Asturies, un futuru que persaben qu’España nun yos va facilitar.

This work is licensed under a Creative Commons Attribution 4.0 International License.