La convocatoria de los llunes tendrá formatu presencial y la de los xueves fadráse de manera telemática

 Iniciativa polAsturianu y el Conseyu de Mocedá de Xixón (CMX) recuperen los grupos de conversación informal n’asturianu. Estos grupos, de baldre y nos que nun importa’l nivel d’usu o conocencia, tan empobinaos a toles persones que necesiten d’un espaciu informal, relaxáu y seguru onde quitar el mieu a falar n’asturianu en públicu.

Los grupos informales de conversación son una iniciativa del CMX col envís de que la xente pierda’l mieu a falar n’otros idiomes como’l francés, l’inglés y l’alemán. Pa Iniciativa pol Asturianu resulta perinteresante usar estos espacios como sitios seguros onde’lasturianu medre ensin tar estigmatizáu, p’amosar que se pue falar n’asturianu en toles situaciones sociales, seya cola familia o na cai, nel supermercáu o colos amigos. Son amás una propuesta perfecha pa xente que, nun siendo del país, tea enfotu en conocer la llingua llariega, facilitando la so integración na cultura asturiana.

Pa facilitar la participación a toles persones interesaes, nesta convocatoria van facese dos grupos, ún va ser presencial y l’otru telemáticu. El primeru va aconceyar los llunes a les 18:00 hores nel llar del CMX, n’Avenida Manuel Llaneza, 68, baxu, 33208, en Xixón; mientres que’l segundu, destináu a toles persones que nun seyan a averase físicamente, va ser los xueves a les 18:00 hores al traviés de la plataforma Zoom. Nesti últimu casu hai que rellenar un formulariu na páxina d’Iniciativa pol Asturianu.

El grupu de conversación n’asturianu va entamar el llunes 21 de febreru a les 18:00 hores. Por contra, el grupu a distancia va tener la primer sesión el xueves 24 de febreru, tamién a les 18:00 hores, nesti casu al traviés de Zoom.

Redaición InfoAsturies

This work is licensed under a Creative Commons Attribution 4.0 International License.