Entardáronse 5 años en costruyir los 43,82 km de duple carril de la Y y polo menos otros 5 pa llevantar los 4,4 km del so tercer carril

Ye de suponer que pente l’aniciu de les obres de la Y, nel añu 1971, ya’l del so tercer carril pente Llugones y Matalablima, nel 2.012, les téuniques, materiales y maquinaria de costrución meyoraren, aparte de la mayor facilidá qu’implica’l treslladu pela mesma autovía de camiones y material. Sicasí, proporcionalmente, la nueva obra d’ampliacion de carril va venti vegaes más llento, entardándose tanto en facer 43 km de doble carril -incluyendo entraes y salíes, medianes y señalización- comu en facer 4,4 de carril cenciellu.

Podemos echar la culpa a la complicación de contratar una xunión temporal d’empreses, qu’al tiempu socontrató a otres empreses, dalgunes de les cuales quebraron pel camín dexando a los trabayaores na cai, pero si bien ye verdá que la UTE Lantania SLU y ASCH Infraestructuras y Servicios SA ta siendo bultablemente más llenta que l’axudicataria de va mediu sieglu, Entrecanales y Tavora SA, tamién lo ye que la escesiva burocratización del proyeutu y la llentitú de les tramitaciones faen que la obra avance más sele nel papel que na calzada.

Los costructores consideren tamién que’l presupuestu, 22,5 millones d’euros, ye ruinu pa la obra y que les añalidaes -7 millones al añu-  torguen trabayar a varios turnos, como sedría lo afayaizao pa finar nun par d’años. Remembremos qu’Asturies devolvío 96 millones d’euros del presupuestu xeneral del Estáu destináu a infracadarmes nel añu d’aniciu d’esta obra, lo qu’implica’l 43’1% de lo presupuestao pa obres n’Asturies esi añu.