La medría de más del 7% del Índiz de Precios al Consumu imposibilita matemáticamente que los trabayaores mileuristes cubran gastos

Vamos echar cuentes rápides. El preciu mediu de l’alquiler d’una vivienda n’Asturies ta pente los 450 y 500 €, ello ye, mediu SMI. Enllenar el depósitu’l coche cuesta güei más de 90 euros, ello ye, un 9% d’un salariu mileurista. Al recibu la lluz ya’l gas correspuende al menos otru 10% y si sumamos el caprichu de cuntar con  con teléfonu/interné -imprescindible tantu pa buscar trabayu comu pa desendolcar la mayoría d’ellos- tenemos de marxe menos del 25% del salariu pa vivir. Eso si se tien suerte y se cuenta con un contratu ye a xornada completa que cumple la llegalidá.

El 25% del SMI son 250 euros, especifico, pa que nun se nos despisten les cifres. Con ellos supónse qu’una familia tien d’enfrentase a los gastos corrientes, basicamente, comer, vistise y material escolar. Con un incrementu del 7’4% del preciu los alimentos  la cosa enguedéyase abondo. Trabayar ya nun da pa vivir.

Nun digo ya comu queden les coses pa los perceutores del IMV (remembremos, 491,63€ mensuales). Nesi casu, anantes d’entamar siquiera a comer tenemos gastaos el 150% de los ingresos.