El día de la Muyer -lo de Trabayaora vamos dexalo pa práu- ye munches coses, pero non feliz
2022, Asturies, cuasique una violación femenina por selmana, un 208% más qu’anantes del covid. La mayor brecha salarial del Estáu, fasta un 26% de diferencia salarial añal pente lo que ganen homes y muyeres. El paru baxa pa los homes (menos 1’1%) el mesmu mes que sube pa les muyeres (+0,3%). Asina solo pa dar unes cifres.
A nivel global nun quiero falar muncho, danme respigos. 736 millones de muyeres vives güei, más d’una de ca tres, reconoz qu’esperimentare a lo llargo la so vida dalguna forma de violencia física o sesual. Albídrase que se callen más abusos de los que se cuenten, especialmente nos países menos desendolcaos y nos más afeutaos pola relixón. Acordies la ONU en toles fasteres del mundiu, ensin esceición, les muyeres cobren menos, siendo ello que la gran mayoría de les muyeres del mundiu nun tienen posibilidá d’aceder siquier a un contratu (una muyer por cada tres homes). l’Añu pasáu más de 87.000 muyeres foron asesinaes pol fechu de selo en tol mundiu.
Les muyeres somos el 51% de la población, pero siguimos siendo’l 75% de los probes ya’l 83% de les families monoparentales, percibimos l’11% del capital y poseemos l’1% de la tierra.
Entós… ¿De que val manifestase? Años de manifestaciones multitudinaries y la cosa va pocu a meyor, por nun decir otra cosa. Un agresor nun dexa de selo porque se-y diga que ta mal y les alministraciones de sobra saben como va el tema. Esti añu nin siquier facemos güelga, vese que’l movimientu feminista ya nun ta tan de moda.
Entá asina , salimos a la cai, añu tres d’añu, glayamos, tocamos la pandereta ya’l bombu, baillamos, xuntámonos y vemos que nun tamos soles, qu’eses coses que mos pasen, que mos pasaron, pasen a toes. Vemos que somos fuertes, que somos munches, que somos presente pasáu y futuru y vuelven, volvemos pa casa cola convicción de que nun mos vamos dexar aplastar, que vamos denunciar esi abusu, esi acosu llaboral, esi maltratu, esi contratu illegal, ensin miéu, porque sabemos que tres de nosotres tenemos una marea que mos sofita. Volvemos con puxu pa seguir lluchando los 364 díes restantes.
Por eso collacios, collacies, nun me feliciteis, lluchar conmigu. Espérovos -a toos y toes- nos manifestamientos.
Llucía F. Marqués
This work is licensed under a Creative Commons Attribution 4.0 International License.
