L’Estáu invierte 1.100 millones d’Euros na “Nuea Economía de la llingua”, incluyendo a les llingües oficiales. Asturies queda fuera
El gobiernu español vien d’anunciar que’l Conseyu de Ministros aprobare’l PERTE “Proyeutu Estratéxicu pola Recuperación y Tresformación Económica”, un istrumentu de collaboración pública col seutor priváu col envís de sofitar la economís demientres y tres del andanciu del Covid.
Dientro’l PERTE, el proyeutu “Nuea Economía de la llingua” tien l’xetivu de movilizar la inversión pública y privao pa masimizar el valor del español y de les llingües cooficiales del Estáu demientres el procesu de tresformación dixital a nivel mundial.
Un total de 1.100 millones d’euros d’inversión impulsarán tola cadena de valor de les llingües, del conocimientu y de la intelixencia artificial, que tan nel cientru la dixitalización. El proyeutu pretende garantizar de forma prioritaria que la intelixencia artificial piense n’español, gallego, vasco y catalán y que los falantes d’estes llingües tengan un papel protagonista nel xorrecimientu y la creación d’emplegu de calidá.
Pa ello, cuenta con un presupuestu de 1.100 millones de millones d’euros d’inversión pública, de los que polo menos 30 millones tan destinaos n’esclusiva a sofitar proyeutos en llingües cooficiales.
Pente los proyeutos que se desendolcarán figuren la creación de nueos corpus (orales, canciu, llinguax de señes…) nestes cuatro llingües pal so usu por empreses ya investigaores, el sofitu a la Intelixencia artificial nelles, la xeneración y l’espardimientu nacional ya internacional de la ciencia ya’l conocimientu nesos idiomes o’l desendolcu y meyora funcional de la produción audiovisual ya’l seutor del vidioxuegu, asina comu la dixitalización de contenios y fondos documentales de museos y padremuñu.
Comu siempres, los asturianos vémonos escluyíos d’esa inversión y d’esa posibilidá de xenerar emplegu y riqueza por nun cuntar col estatus de llingua oficial.
Llucía F. Marqués
This work is licensed under a Creative Commons Attribution 4.0 International License.
