La supresión del contratu d’obra na reforma llaboral ye una midía que pretende afalar los contratos indefinios, aparando l’altísimu porcentaxe qu’escondía falsos temporales con esi contratu, teniendo llibertá de despidu.

Sicasí, en dalgunos seutores la contratación indefinía nin siquier se contempla como una posibilidá pa sustituir a estos contratos y los llaboratorios universitarios alvierten que si nun pueden facer contratu d’obra y serviciu tendrán que despedir a los sos investigaores en seis meses. La Universidá reconoz que lo ideal sedría facer contratos indefinios, pero’l presupuestu nun algama pa ello y fasta agora los contratos avezaben dir asociaos a proyeutos concretos, teniendo una duración de dos o tres años. Ello tampocu garantizaba la estabilidá llaboral de los investigaores que, en cuantes teníen oportunidá, colaben a otros llugares con meyores condiciones llaborales. Agora direutamente nun se presenten voluntarios a cubrir delles places disponibles pa contratu de mediu añu.

Otru problema ensin resolver ye que’l plazu mínimu de los contratos en formación ye d’un añu, ello ye, implica un coste de 22.000 euros, lo qu’escluye cualisquier proyeutu con presupuestu menor 22.000 euros.