Los planes de “reestructuración” que la empresa tien pa les istalaciones de la antigua empresa pública Ensidesa, privatizá pol gobiernu español, impliquen la desapaición a curtiu plazu de más de mil puestos de trabayu, amenorgando en más d’un millón de tonelaes la so produción.

La empresa siderúrxica recibe abondos fondos de la Xunión Europea.  En concretu, Arcelor-Mittal recibe aídes públiques millonaries comu compensación polos costes d’emisión indireuta de CO2, asina comu beneficios importantes cola declaración de los ERTEs. Aparte, Arcelor-Mittal Investigación y Desenrollu, SL tamién recibió sovenciones millonaries de les alministraciones públiques, siendo toes estes inversiones feches a fondu perdíu.

Énte esta situación, Andecha Astur treslladó a la Comisión Europea una riestra d’entrugues empobinaes a venceyar les aides europees a fondu perdíu col caltenimientu de les empreses beneficiaries nel territoriu onde se-yos concedió. Tamién consultaron la posibilidá d’un plan de compensación européu pa amortiguar l’efeutu d’estos despidos y si recibieren dalgún pidíu nesi sen por parte’l gobiernu español o asturianu.

Dende la coalición nacionaliega unvien el so sofitu a los trabayaores de la siderúrxica, a los qu’acompanguen nes sos movilizaciones y vindicaciones.