La Confederación Hidrográfica impón una sanción de namás 600 € a CADASA por contaminar con bacteries fecales el Ríu Lindebarcas
El Consorciu d’Agües d’Asturies (CADASA) fore denunciáu pola Coordinadora Ecoloxista d’Asturies pola superación de los valores llende autorizaos pa bacteries coliformes nos arramaos de la depuradora de Novellana al ríu Lindebarcas, col correspondiente pelligru pa la salú pública.
La contaminación xenerá pola depuradora afeutó tanto a les agües del ríu Lindebarcas comu a la sablera Salencia, en Cuideiru, comu demostraron les amueses recoyíes nel branu de 2021 pola Coordinadora y analizaes nun llaboratoriu acreditáu, que dieron valores mui elevaos de coliformes fecales, presentando niveles d’Escherichia coli superiores a 2400 u.c.f. en tolos puntos de muestreu, siendo 500 la llende llegal pa considerar les agües aptes pal bañu.
La CEA considera ridícula la multa “Esta sanción a CADASA por incumplimientu de la autorización d’arramáu d’agües residuales de la EDAR de Novellana, confirma otra vuelta lo barato que resulta contaminar n’Asturies. Ye indignante qu’unos fechos que ponen en pelligru la salú de les persones se castiguen con una sanción tan ridícula, másime si tenemos en cuenta que la empresa sancioná, que manexa un presupuestu multimillonariu de dineru público, ye la encargá del abastecimientu d’agua potable y del tratamientu afayaizu de les agües residuales y la so salubridá”.
Si la sanción por parte la Confederación Hidrográfica ye ruina, pior ye l’actuación del Principado y la rempuesta del Conceyu Cuideiru, o meyor dicho, l’ausencia d’actuación y rempuesta d’estos organismos, que cenciellamente inoraron les denuncies.
Redaición InfoAsturies
This work is licensed under a Creative Commons Attribution 4.0 International License.
