Jaime Izquierdo restó importancia a que la población d’Asturies baxe del millón de persones, cifra que nun se pasaba dende anantes del 1960

“Nun ye un abismu, ye una cifra, nun podemos saber si Asturies puede equilibrase tamién, por casu, con 700.000 habitantes” declaró el Comisionáu pal Retu Demográficu, qu’afirmó amás de que nun tomaría decisiones “con efeutos inmediatos” p’atayar la sangría d’asturianos. Remembremos que’l plan demográficu entamáu por izquierdo cuntó con un desembolsu de 1192 millones d’euros y qu’otros 1.083 tan disponibles pa gastar neses decisiones ensin efeutu inmediatu, tan escasamente definíes que’l comisionáu fala de “l’aplicación de teoríes y modelos entá non conocios” y de que “tendrán que buscar dalguna estratexa”

Coles sos declaraciones, Izquierdo resta importancia a la progresiva desapaición del pueblu -y por ende de la cultura ya identidá- asturianu. Menacia tamién el nivel de vida d’esi millón escasu d’asturianos, ya que la perda de moraores tien, pente otres consecuencies, la de la perda de financiación autonómica y la merma del ya escasu pesu políticu d’Asturies en Madrid, peligrando otru de los diputaos asturianos depués de que se perdiere ya un nel 2019.

1981 foi l’añu en qu’Asturies algamó’l so másimu poblacional, con 1.129.556 asturianos nel territoriu. De magar entós les sucesives “reconversiones” auspiciaes polos tamién sucesivos gobiernos del PSOE marcaron l’aniciu del declive ya’l 202, con un ritmu de 23 asturianos menos al día, ye la fecha prevista pa baxar del millón. Ye la hestoria d’un xenocidiu anunciáu que naide nun quiso ver cuando se taba a tiempu d’aparar y qu’agora nun pue revertise si nun ye creando les condiciones pal retornu de la mocedá emigrao.

Llucía F. Marqués