Nos tres prósimos años 233 mélicos d’Atención Primaria tendrán edá de xubilase, pero namás 134 residentes finarán la so formación pa esa plaza

D’equí al 2024 namás 134 residentes finarán la so formación comu especialistes en Melecina de Familia y Comunitaria, 99 menos de los que fadríen falta namás pa cubrir les xubilaciones previstes nesi plazu. La falta de relevu xeneracional nesti casu ye intencioná, a desemeyanza d’otres profesiones nes que la mocedá nun garra’l testigu por falta de posibilidaes económiques. Los númberos clausus na Facultá de Melecina d’Uviéu, los pilancos p’algamar el MIR y les poques places pal mesmu asignaes a Asturies retayaron la posibilidá de cientos de mozos y moces asturianes de formase comu especialistes mélicos. Agora’l Sespa enfréntase a un problema seriu, nun hai mélicos abondos, dicen.

Les condiciones llaborales nel sistema públicu de salú asturianu nun aiden a meyorar la situación: los titulaos en rames sanitaries busquen destinos con salarios más altos, mayor estabilidá y menor sobrecarga llaboral.

El resultáu previsible, aparte del amenorgamientu de costes buscáu pola alministración asturiana, ye la sobrecarga de los facultativos y la cayía -más entá- de la calidá asistencial.

Por conceyos, Uviéu y la so ária sanitaria (d’Uviéu a Quirós) ye de los más perxudicaos: de les 88 xubilaciones de mélicos xeneralistes previstes namás hai 34 places MIR que los repongan. L’aria de Xixón tendrá un déficit de 14 mélicos y les fasteres ya abandonaes comu Xarrio, Cangas o Les Arriondes ya nun contemplen siquiera places MIR, nun repondrán nin un de los 23 mélicos que se xubilarán nesti trimestre.

Esti problema nun afeuta namás a los mélicos de familia, la plantilla de mélicos especialistes n’Asturies ronda los 3.400 y nos prósimos años faltarán por cubrir más de 200 vacantes en al menos 30 especialidaes. El déficit, en dalgunes especialidaees, perpasa’l 30%.

Nuria Prendes